Last Updated on by Sampurna Samachar
જાણીતી સીનરજી મલ્ટી સ્પેશ્યાલીટી હોસ્પિટલમાં ચોરીનો બનાવ
વહેલી સવારે લોકોની ઓછી અવર જવરમાં આપ્યો અંજામ
(સંપૂર્ણ સમાચાર સેવા)
અમદાવાદમાં ચોરોનો આતંક હવે હોસ્પિટલ તરફ વધ્યો છે. ચાંદખેડાની જાણીતી સીનરજી મલ્ટી સ્પેશ્યાલીટી હોસ્પિટલમાં ચોરીની એક સનસનાટીભરી ઘટના સામે આવી છે. આશ્ચર્યની વાત એ છે કે આ ચોરી કોઈ બહારની વ્યક્તિએ નહીં, પરંતુ હોસ્પિટલના જ સ્ટાફ મેમ્બરે કરી હોવાની વિગતો પ્રકાશમાં આવી છે.
હોસ્પિટલ પ્રશાસન દ્વારા નોંધાવવામાં આવેલી ફરિયાદ મુજબ, આ ઘટના વહેલી સવારે બની હતી. જ્યારે હોસ્પિટલમાં દર્દીઓ અને અન્ય સ્ટાફની અવરજવર ઓછી હતી, ત્યારે સ્ટાફના એક સભ્યએ વહીવટી કેબિનને નિશાન બનાવી માત્ર ૪ મિનિટમાં આખી ઘટનાને અંજામ આપ્યો હતો.
હોસ્પિટલના અન્ય સ્ટાફની પણ પૂછપરછ
ચાલાકીપૂર્વક કેબિનમાં પ્રવેશી, લાકડાના ટેબલના ડ્રોવરનું લોક તોડી અંદર રાખેલી ૭૦,૦૦૦ની રોકડ રકમની ચોરી કરી હતી. સ્ટાફ મેમ્બરને પહેલેથી જ ખબર હતી કે વહીવટી કામકાજની રોકડ ક્યાં રાખવામાં આવે છે.
ભલે તસ્કરે અત્યંત પ્રોફેશનલ રીતે લોક તોડ્યું હતું, પરંતુ તે હોસ્પિટલના ત્રીજી આંખ સમાન કેમેરાથી બચી શક્યો નથી. કેમેરામાં તસ્કરની તમામ ગતિવિધિઓ સ્પષ્ટપણે કેદ થઈ ગઈ છે. ફૂટેજમાં તે કેબિનમાં પ્રવેશતા, ડ્રોવર તોડતા અને રોકડ લઈને નાસી છૂટતો જોવા મળી રહ્યો છે.
આ ઘટના અંગે હોસ્પિટલ મેનેજમેન્ટ દ્વારા સ્થાનિક પોલીસ સ્ટેશનમાં ફરિયાદ દાખલ કરવામાં આવી છે. પોલીસ અધિકારીએ અમે સીસીટીવી ફૂટેજ કબજે કર્યા છે અને તેના આધારે તસ્કરની ઓળખ કરવાની પ્રક્રિયા શરૂ કરી દીધી છે. ટૂંક સમયમાં જ આરોપીની ધરપકડ કરવામાં આવશે. પોલીસે હાલમાં અલગ-અલગ દિશાઓમાં તપાસના ચક્રો ગતિમાન કર્યા છે. હોસ્પિટલના અન્ય સ્ટાફની પણ પૂછપરછ કરવામાં આવી રહી છે જેથી આમાં અન્ય કોઈની સંડોવણી છે કે કેમ તે જાણી શકાય.
