Last Updated on by Sampurna Samachar
ગાંધીધામની કંપનીના ડાયરેક્ટર સામે ગુનો દાખલ
૨૦.૫૬ કરોડની કથિત છેતરપિંડી
(સંપૂર્ણ સમાચાર સેવા)
જામનગર શહેરમાં કરોડો રૂપિયાની આર્થિક ગેરરીતિ અને કથિત છેતરપિંડીનો એક ગંભીર મામલો સામે આવ્યો છે. શહેરના સીટી બી ડિવિઝન પોલીસ મથકમાં નોંધાયેલી ફરિયાદ મુજબ, જામનગરની એક શિપિંગ કંપની સાથે રૂ.૨૦.૫૬ કરોડથી વધુની રકમના વ્યવહારમાં ગુનાહિત વિશ્વાસઘાત અને છેતરપિંડી આચરવામાં આવી હોવાનો આક્ષેપ કરવામાં આવ્યો છે. પોલીસ દ્વારા કેસ નોંધીને સમગ્ર મામલે તપાસ શરૂ કરવામાં આવી છે.
પ્રાપ્ત વિગતો અનુસાર, જામનગરના સ્વસ્તિક સોસાયટી વિસ્તારમાં રહેતા અને શ્રીજી શિપિંગ કંપની સાથે સંકળાયેલા ઉદ્યોગપતિ જીતેન્દ્ર હરિદાસ લાલ દ્વારા ફરિયાદ નોંધાવવામાં આવી છે. ફરિયાદમાં જણાવ્યા મુજબ, ગાંધીધામ સ્થિત મહેશ્વરી હેન્ડલિંગ એજન્સી પ્રાઇવેટ લિમિટેડના ડાયરેક્ટર ચંદનકુમાર છગનલાલ મહેશ્વરીએ તેમની કંપની પાસેથી બાર્જ, ટગ ભાડે લેવા ઉપરાંત વિવિધ સ્ટીવડોરિંગ અને મરીન સંબંધિત સેવાઓનો લાભ લીધો હતો.
કંપનીઓને આર્થિક નુકસાન પહોંચાડવામાં આવ્યું
ફરિયાદી પક્ષના જણાવ્યા મુજબ, આ સેવાઓ બદલ ચૂકવવાના રૂ.૨.૫૬ કરોડથી વધુ બાકી રહ્યા હતા. ઉપરાંત સિદ્ધિ મરીન સર્વિસિસ એલએલપી પાસેથી મેળવેલી સેવાઓના રૂ.૧૩.૭૩ કરોડ તેમજ નરોત્તમકા કોમોડિટીઝ પ્રાઇવેટ લિમિટેડ પાસેથી લેવામાં આવેલી લોન અને તેના વ્યાજની રૂ.૪.૨૬ કરોડથી વધુની રકમ પણ ચુકવવામાં આવી ન હોવાનું જણાવાયું છે.
આ તમામ બાકી રકમનો સરવાળો રૂ.૨૦,૫૬,૮૫,૩૮૪ સુધી પહોંચે છે. ફરિયાદમાં આરોપ મૂકવામાં આવ્યો છે કે ઇરાદાપૂર્વક ચૂકવણી ટાળીને કંપનીઓને આર્થિક નુકસાન પહોંચાડવામાં આવ્યું છે, જે ગુનાહિત વિશ્વાસઘાત અને છેતરપિંડીની શ્રેણીમાં આવે છે.
પોલીસે ભારતીય ન્યાય સંહિતાની કલમ ૩૧૬(૨) હેઠળ ગુનો નોંધી વધુ તપાસ હાથ ધરી છે. તપાસ દરમિયાન આર્થિક વ્યવહારો, કરારો અને સંબંધિત દસ્તાવેજોની ચકાસણી કરવામાં આવશે. કેસની ગંભીરતાને ધ્યાનમાં રાખીને પોલીસ દ્વારા આગળની કાયદેસરની કાર્યવાહી કરવામાં આવી રહી છે.
