Last Updated on by Sampurna Samachar
ટેસ્ટ ટીમમાં ઘણા યુવાનોને તક મળી શકે
મજબૂત બોલરોનો એક પૂલ તૈયાર કરી શકાય
(સંપૂર્ણ સમાચાર સેવા)
ICC ચેમ્પિયન્સ ટ્રોફી ૨૦૨૫ નો ખિતાબ જીત્યા બાદ, ટીમ ઈન્ડિયાના તમામ ખેલાડીઓ હવે IPL આગામી ૨૦૨૫ સીઝન માટે તૈયારીમાં વ્યસ્ત છે. જ્યારે બીજી તરફ ટીમ ઈન્ડિયાના હેડ કોચ ગૌતમ ગંભીર એક્શન મોડમાં આવી ગયા છે.
ગૌતમ ગંભીરે IPL બાદ ઈંગ્લેન્ડમાં યોજાનારી પાંચ ટેસ્ટ મેચની સીરિઝ માટે એક મોટું પગલું ભરવાનું મન બનાવી લીધું છે. એક અહેવાલ પ્રમાણે ઈંગ્લેન્ડ પ્રવાસ પહેલા જ ગંભીર ઈન્ડિયા ‘છ‘ ટીમ સાથે ઈંગ્લેન્ડ જઈ શકે છે. જેમાં તે તમામ વિકલ્પો અજમાવવા માંગે છે અને ટેસ્ટ ટીમમાં ઘણા યુવાનોને તક આપી શકે છે.
છ ટીમ સાથે પ્રવાસ પર જશે ગંભીર
ટીમ ઈન્ડિયાનો ઈંગ્લેન્ડ પ્રવાસ ૨૦ જૂનથી શરૂ થઈ રહ્યો છે. પરંતુ અહેવાલ મુજબ, હેડ કોચ ગંભીર તે પહેલાં ઈન્ડિયા ‘છ‘ ટીમ સાથે ઈંગ્લેન્ડ જવા રવાના થશે. જો ગંભીર (GAMBHIR) ઈંગ્લેન્ડ જાય છે, તો આ પહેલીવાર હશે જ્યારે સિનિયર ટીમનો હેડ કોચ ઈન્ડિયા ‘છ‘ ટીમ સાથે પ્રવાસ પર જશે.
BCCI ના એક સૂત્રએ જણાવ્યું કે, ગંભીર આગામી બે વર્ષ માટે તમામ ફોર્મેટ માટે રોડમેપ તૈયાર કરી રહ્યો છે જે ૨૦૨૭ ના વનડે વર્લ્ડ કપ સુધી ચાલુ રહેશે. આ તબક્કામાં વર્લ્ડ ટેસ્ટ ચેમ્પિયનશિપ અને ૨૦૨૬ T૨૦ વર્લ્ડ કપ પણ સામેલ હશે.
સૂત્રએ જણાવ્યું કે, ઓસ્ટ્રેલિયાથી પરત ફર્યા બાદ ગંભીર BCCI સાથે ચર્ચામાં છે. તેણે રિઝર્વ પૂલ વિશે સ્પષ્ટ જાણકારી મેળવવા માટે ઈન્ડિયા ‘છ‘ ટીમ સાથે ઈંગ્લેન્ડ જવાની ઈચ્છા વ્યક્ત કરી છે. ગંભીરે કેટલાક વાઈલ્ડ કાર્ડ ખેલાડીઓ રાખવાનો આગ્રહ રાખ્યા પછી ભારતે ચેમ્પિયન્સ ટ્રોફી જીતી હતી, તેથી આશા છે કે તે ભવિષ્યમાં આ પર વધુ ભાર મૂકશે.
ટેસ્ટ ટીમ ઈન્ડિયાની વાત કરીએ તો ગૌતમ ગંભીર હવે ઈન્ડિયા ‘છ‘ના ઈંગ્લેન્ડ પ્રવાસ પર રોહિત શર્માની જગ્યાએ એક મજબૂત ઓપનર શોધવા માગશે. જ્યારે મિડલ ઓર્ડરમાં પણ ટેસ્ટ ક્રિકેટમાં પણ એક સારા બેટ્સમેનની જરૂર હોય છે. અત્યાર સુધી અભિમન્યુ ઈશ્વરન અને સરફરાઝ ખાનને વધુ તકો નથી મળી. ગત ઓસ્ટ્રેલિયા પ્રવાસ દરમિયાન આ બંને ખેલાડીઓ બેન્ચ પર જ બેઠા રહ્યા હતા. પરંતુ હવે ગંભીર કેટલાક યુવા ખેલાડીઓને ટેસ્ટ ટીમમાં પણ સેટ કરવા માગે છે. જેમાં સાઈ સુદર્શન અને કરુણ નાયરના નામ પણ નજર આવી રહ્યા છે. આ ઉપરાંત જસપ્રીત બુમરાહની ફિટનેસની ચિંતાઓને કારણે તે ઈંગ્લેન્ડ પ્રવાસ માટે એક મજબૂત ફાસ્ટ બોલર પણ શોધવા માગે છે. જેથી મજબૂત બોલરોનો એક પૂલ તૈયાર કરી શકાય છે.
