Last Updated on by Sampurna Samachar
આ પહેલાં ચેતેશ્વર પૂજારાએ ભારત માટે આ સિદ્ધિ મેળવી હતી
હવે દેવદત્ત પડિક્કલે દિગ્ગજ ક્રિકેટરોની બરાબરી કરી
(સંપૂર્ણ સમાચાર સેવા)
શ્રીલંકા સામે કોલંબોમાં ચાલી રહેલી બીજી ટેસ્ટમાં દેવદત્ત પડિકલે સદી ફટકારીને ઇતિહાસ રચ્યો છે. બીજી ટેસ્ટના પહેલા દિવસે, પડિકલે ૧૬૬ બોલમાં પોતાની સદી પૂરી કરી. આ ટેસ્ટ ક્રિકેટમાં તેની બીજી સદી છે; તેણે અગાઉ ગાલેમાં રમાયેલી પહેલી ટેસ્ટની પહેલી ઇનિંગમાં ૧૬૭ રન બનાવ્યા હતા. તે લગભગ સાત વર્ષમાં નંબર-૩ પોઝિશન પર રમનાર પ્રથમ ભારતીય બેટ્સમેન છે જેણે સતત બે ટેસ્ટમાં સદી ફટકારી છે. દેવદત્ત પડિકલ પહેલાં, ચેતેશ્વર પૂજારાએ ભારત માટે આ સિદ્ધિ મેળવી હતી.
ગાલે ટેસ્ટમાં રેકોર્ડતોડ ઈનિંગ્સ રમ્યા બાદ હવે કોલંબો ટેસ્ટમાં પણ પડિક્કલના બેટથી વધુ એક શાનદાર સદી નીકળી છે. બીજી ટેસ્ટમાં પડિક્કલના બેટથી ૧૧૭ રન બન્યા હતા. સતત બીજી મેચમાં સદી ફટકારીને તેણે સાબિત કરી દીધું છે કે તે આ ફોર્મેટમાં લાંબી રેસનો ઘોડો છે. ગાલેમાં રમાયેલી સિરીઝની પ્રથમ મેચમાં દેવદત્તે કુલ ૨૧૧ રન બનાવ્યા હતા અને ‘પ્લેયર ઓફ ધ મેચ‘ બન્યો હતો.
૭ ટેસ્ટ મેચોમાં ૩૮૩ રન બનાવ્યા સાઇએ
ગાલેની પ્રથમ ઈનિંગ્સ દરમિયાન ૨૩૦ બોલમાં ૧૫ ચોગ્ગા અને ૧ છગ્ગાની મદદથી પડિક્કલે ૧૬૭ રન બનાવ્યા હતા. જ્યારે બીજી ઈનિંગ્સમાં તેણે ઝડપી અંદાજમાં ૭૫ બોલમાં ૪૪ રન બનાવવાનું કામ કર્યું હતું. આ પહેલા શ્રીલંકા ક્રિકેટ ઈલેવન સામેની પ્રેક્ટિસ મેચમાં પણ પડિક્કલે સદી ફટકારી હતી.
ગાલેમાં નંબર ૩ પર રમતા ૧૬૭ રન બનાવવા એ કોઈ નાની વાત નહોતી. વર્ષ ૨૦૦૯ પછી શ્રીલંકાની ધરતી પર ટેસ્ટ રમતી વખતે ત્રીજા નંબરે કોઈ પણ ભારતીયનો આ સૌથી મોટો સ્કોર હતો. રાહુલ દ્રવિડ જેવા મહાન બેટ્સમેનોની યાદ અપાવતી આ ઈનિંગ્સ પછી પડિક્કલે કોલંબોમાં પણ પોતાનું એ જ ફોર્મ ચાલુ રાખ્યું અને એક છેડો સાચવીને ટીમને મજબૂત શરૂઆત અપાવી.
વિનોદ કામ્બલી, મોહમ્મદ અઝહરુદ્દીન, સચિન તેંડુલકર, વિરેન્દ્ર સેહવાગ અને શિખર ધવને શ્રીલંકાની ધરતી પર રમતી વખતે એક જ ટેસ્ટ સિરીઝની અંદર બે સદી ફટકારી હતી. હવે દેવદત્ત પડિક્કલે પણ આ દિગ્ગજોની બરાબરી કરી લીધી છે. આ સિરીઝની શરૂઆતમાં પડિક્કલ પ્લેઇંગ-૧૧ ની પ્રથમ પસંદગી નહોતો. જો સાઈ સુદર્શન સંપૂર્ણપણે ઉપલબ્ધ હોત તો કદાચ પડિક્કલને બેન્ચ પર જ બેસવું પડ્યું હોત. પરંતુ કિસ્મતે પાસું પલટ્યું અને તક દેવદત્તને મળી.
બીજી તરફ સાઈ સુદર્શનને ટેસ્ટ ફોર્મેટમાં સતત તકો આપવામાં આવી, પરંતુ તે તેને વટાવવામાં થોડો નિષ્ફળ રહ્યો. સુદર્શને અત્યાર સુધી ૭ ટેસ્ટ મેચોમાં લગભગ ૩૧ ની એવરેજથી ૩૮૩ રન બનાવ્યા છે, જેમાં ૩ અડધી સદી સામેલ છે, પરંતુ તે એક પણ સદી ફટકારી શક્યો નથી.
