Last Updated on by Sampurna Samachar
પોલીસે અકસ્માત મોતનો ગુનો નોંધી તપાસ શરૂ કરી
ઘટનાને પગલે ગામમાં શોકની લાગણી
(સંપૂર્ણ સમાચાર સેવા)
જામનગર જિલ્લાના ધ્રોલ શહેરમાં અકસ્માતની ઘટના સામે આવી છે. ધ્રોલ તાલુકાના નથુવડલા ગામના ૭૫ વર્ષીય વશરામભાઈ તરશીભાઈ ચાવડાનું બાઇક પરથી ઉતરતી વખતે પગ લપસતાં ગંભીર ઇજા થવાથી સારવાર દરમિયાન કરુણ મોત નીપજ્યું છે. આ ઘટનાએ ગામમાં શોકની લાગણી ફેલાવી દીધી છે.
મળતી માહિતી અનુસાર, વશરામભાઈ પોતાના પુત્ર સાથે મોટરસાઇકલ પર ધ્રોલ શહેરમાં કેટલાક વ્યક્તિગત કામ માટે આવ્યા હતા. તેઓ નગરપાલિકા કમલા નેહરુ બાગ નજીક પહોંચ્યા બાદ બાઇક ઊભી રાખવામાં આવી હતી. ત્યારબાદ વશરામભાઈ બાઇક પરથી નીચે ઉતરવાનો પ્રયાસ કરી રહ્યા હતા. જોકે વૃદ્ધાવસ્થાના કારણે તેમનો સંતુલન બગડ્યો અને પગ લપસતાં તેઓ સીધા રોડ પર પટકાયા હતા.
છાતીમાં દુખાવો અને ગભરામણ શરૂ થતાં હાર્ટ એટેક આવ્યો હતો
પડવાના કારણે તેમને શરીરના વિવિધ ભાગોમાં ગંભીર ઇજાઓ પહોંચી હતી. ઘટનાસ્થળે હાજર લોકોએ તરત જ પરિવારજનોને જાણ કરી હતી અને તેમને સારવાર માટે પ્રથમ તાત્કાલિક સહાય આપવામાં આવી હતી. ત્યારબાદ વધુ સારવાર માટે તેમને જામનગરની હોસ્પિટલમાં લઈ જવાનો ર્નિણય લેવામાં આવ્યો હતો.
પરંતુ જામનગર લઈ જતી વખતે રસ્તામાં તેમની તબિયત અચાનક વધુ બગડી ગઈ હતી. પોલીસની પ્રાથમિક માહિતી મુજબ, તેમને છાતીમાં દુખાવો અને ગભરામણ શરૂ થતાં હાર્ટ એટેક આવ્યો હતો. હોસ્પિટલ પહોંચતા પહેલાં જ તેમનું મૃત્યુ નીપજ્યું હોવાનું સામે આવ્યું છે. આ ઘટનાએ પરિવારજનોને ભારે આઘાત પહોંચાડ્યો છે.
ઘટનાની જાણ થતાં ધ્રોલ પોલીસ તાત્કાલિક સ્થળ પર પહોંચી હતી અને જરૂરી કાર્યવાહી હાથ ધરી હતી. પોલીસે સમગ્ર બનાવ અંગે અકસ્માત મોતનો ગુનો નોંધ્યો છે. મૃતદેહને પોસ્ટમોર્ટમ માટે મોકલી આપવામાં આવ્યો હતો અને ત્યારબાદ પરિવારજનોને સોંપવામાં આવ્યો હતો.
પ્રાથમિક તપાસમાં આ બનાવ અકસ્માતજન્ય હોવાનું સામે આવ્યું છે. તેમ છતાં પોલીસ તમામ પરિસ્થિતિઓની તપાસ કરી રહી છે અને ઘટનાક્રમ અંગે વધુ માહિતી એકત્રિત કરવામાં આવી રહી છે. વૃદ્ધના અચાનક અવસાનથી નથુવડલા ગામમાં શોકનો માહોલ છવાઈ ગયો છે, જ્યારે સ્થાનિક લોકોએ વૃદ્ધો માટે વાહન પરથી ઉતરતી વખતે ખાસ સાવચેતી રાખવાની જરૂરિયાત પર ભાર મૂક્યો છે.
