Last Updated on by Sampurna Samachar
કોચ કમ અધિકારીએ સિટી ઈજનેરને પત્ર લખ્યો હોવાની માહિતી
પ્લાન્ટ રૂમ, ઓફિસ તેમજ વીજ રૂમો જર્જરિત
(સંપૂર્ણ સમાચાર સેવા)
અમદાવાદ મ્યુનિ. કોર્પોરેશન દ્વારા બનાવાયેલ સ્વિમિંગ પુલની હાલત અતિ ખરાબ હોવાનુ સામે આવ્યુ છે. વાત કરીએ તો નવી સુવિધાઓ આપવાની વાત તો દૂર રહી, હયાત સુવિધાઓની જાળવણી પણ યોગ્ય રીતે થઈ રહી નથી.
ઉલ્લેખનીય છે કે સારંગપુર વિસ્તારમાં આવેલો મ્યુનિ. સંચાલિત સ્વિમિંગ પૂલ ખંડેર અને જર્જરિત ઈમારતોના કારણે અકસ્માતનો ભય તોળાઈ રહ્યો છે. આ સ્વિમિંગ પુલની કોચ કમ અધિકારીએ જ એકાદ મહિના પહેલાં સિટી ઈજનેરને પત્ર પાઠવીને અહીંની ખરાબ દશાનો ચિતાર આપ્યો છે.
તંત્રની બેદરકારીનો કોઇ ભોગ બનશે તો ?
ખાસ કરીને સ્નાનાગારનો પ્લાન્ટ રૂમ, ઓફિસ તેમજ વીજ રૂમો જર્જરિત થઈ ગયા છે. સ્ટોર્મ વોટર લાઈનની કેચપિટો તૂટી ગઈ છે. ઓવરહેડ ટાંકીના ઢાંકણા અને કમ્પાઉન્ડના લોખંડના દરવાજા સુદ્ધા તૂટી ગયા છે. ડેક ઉપરની ટાઈલ્સો ઉખડી ગઈ છે. શાવર રૂમને જોડતી ચેનલો ઉભરાય છે, શાવર લિકેજ છે. પ્લાન્ટરૂમ, ઓફિસ અને વીજરૂમોમાં ગમે ત્યારે અકસ્માત સર્જાઇ શકે ત્યારે સત્વરે આ તમામ સમારકામ હાથ ધરવાની સાથે આગળ તથા પાછળના કોટની દીવાલો ઊંચી કરવા અને તેના પર પતરાં અથવા વાયરથી ફેન્સિંગ કરી આપવાની ભલામણ કરવામાં આવી છે.
સ્વિમિંગ પૂલના સમારકામમાં મ્યુનિ. તંત્ર દ્વારા દાખવતી આ બેદરકારીના કારણે કોઈ કર્મચારી કે સભ્ય અકસ્માતનો ભોગ બને તો જવાબદાર કોણ? તેવો સવાલ જાગૃત નાગરિકોએ ઉઠાવ્યો છે.
