Last Updated on by Sampurna Samachar
મોટી લહેરના કારણે ૨૧ વર્ષના યુવકનું મોત, પરિવારનો ગંભીર આરોપ
યુવક જ્યારે વોટર પાર્કમાં ન્હાઈ રહ્યો હતો, ત્યારે અચાનક મોટી લહેર આવતા તેની તબિયત બગડી હતી
(સંપૂર્ણ સમાચાર સેવા)
નોઈડાના જાણીતા જીઆઈપી મોલ સ્થિત વોટર પાર્કમાંથી એક કરુણ ઘટના સામે આવી છે. અહીં પરિવાર સાથે મોજ-મસ્તી કરવા આવેલા ૨૧ વર્ષીય યુવકનું શંકાસ્પદ સંજોગોમાં મોત નિપજ્યું છે. આ ઘટના મંગળવાર, ૨૮ એપ્રિલના રોજ બની હતી. ગ્રેટર નોઈડાનો રહેવાસી આ યુવક જ્યારે વોટર પાર્કમાં ન્હાઈ રહ્યો હતો, ત્યારે અચાનક મોટી લહેર આવતા તેની તબિયત બગડી હતી અને હોસ્પિટલ પહોંચતા પહેલા જ તેણે દમ તોડી દીધો હતો.
મળતી માહિતી મુજબ, યુવક જ્યારે વોટર પાર્કના વેવ પુલમાં લહેરોનો આનંદ માણી રહ્યો હતો, ત્યારે અચાનક તેને અસ્વસ્થતા અનુભવાઈ હતી. તેની તબિયત ઝડપથી બગડતા તાત્કાલિક હોસ્પિટલ લઈ જવામાં આવ્યો હતો, પરંતુ ત્યાંના ડૉક્ટરોએ તેને મૃત જાહેર કર્યો હતો.
વોટર પાર્કની સુરક્ષા વ્યવસ્થા સામે સવાલો ઉઠી રહ્યા છે
મૃતકના પરિવારે વોટર પાર્ક મેનેજમેન્ટ પર ગંભીર બેદરકારીના આક્ષેપો કર્યા છે. ઘટનાની જાણ થતા જ સેક્ટર ૩૯ પોલીસ સ્ટેશનની ટીમ ઘટનાસ્થળે પહોંચી ગઈ હતી. પોલીસે જણાવ્યું છે કે મોતનું સાચું કારણ જાણવા માટે મૃતદેહને પોસ્ટમોર્ટમ માટે મોકલી આપવામાં આવ્યો છે. પોલીસ અત્યારે એ તપાસ કરી રહી છે કે યુવકના મોત પાછળનું અસલી કારણ કોઈ બીમારી હતી કે વોટર પાર્કની કોઈ વ્યવસ્થામાં ખામી.
નોંધનીય છે કે આ વોટર પાર્કમાં મોતના સમાચાર પહેલીવાર નથી આવ્યા. અગાઉ વર્ષ ૨૦૨૪માં પણ અહીં એક યુવકનું મોત થયું હતું. તે સમયે સ્લાઈડિંગ કરતી વખતે યુવકને શ્વાસ લેવામાં તકલીફ થઈ હતી અને હોસ્પિટલમાં તેને મૃત જાહેર કરાયો હતો. વારંવાર બનતી આવી ઘટનાઓને કારણે હવે વોટર પાર્કની સુરક્ષા વ્યવસ્થા સામે સવાલો ઉઠી રહ્યા છે.
