Last Updated on by Sampurna Samachar
કુલ ૨૮ ચોરીના વાહનો કબજે કરાયા
પોલીસે આરોપીની પૂછપરછ હાથ ધરી
(સંપૂર્ણ સમાચાર સેવા)
સુરત શહેરના પુણા વિસ્તારમાં વાહન ચેકિંગ દરમિયાન પોલીસે બાઈક ચોરીના કેસમાં પિતા અને તેમના સગીર પુત્રને ઝડપી પાડ્યા છે. પોલીસની કાર્યવાહી દરમિયાન તેમની પાસેથી કુલ ૨૮ ચોરીના વાહનો કબજે કરવામાં આવ્યા હોવાનું સામે આવ્યું છે.
પોલીસના જણાવ્યા અનુસાર, શહેરમાં મિલકત સંબંધિત ગુનાઓ પર નિયંત્રણ લાવવા માટે નિયમિત પેટ્રોલિંગ અને વાહન ચેકિંગ કરવામાં આવી રહ્યું હતું. તે દરમિયાન એક શંકાસ્પદ મોપેડ ચાલકને રોકી તેની પાસેથી વાહનના દસ્તાવેજો માંગવામાં આવ્યા હતા. સંતોષકારક જવાબ ન મળતા પોલીસે એન્જિન અને ચેસિસ નંબરની તપાસ કરી, જેમાં વાહન ચોરીનું હોવાનું જાણવા મળ્યું.
આરોપી સગીર પુત્રની મદદથી કરતો ચોરી
ત્યારબાદ આરોપીની પૂછપરછ દરમિયાન વધુ વિગતો સામે આવી. પ્રાથમિક તપાસ મુજબ, આરોપી પોતાના સગીર પુત્રની મદદથી શહેરના વિવિધ વિસ્તારોમાં પાર્ક કરાયેલા બાઈક અને મોપેડને નિશાન બનાવતો હતો. તક મળતાં વાહનો ચોરી કરીને અલગ-અલગ સ્થળોએ છુપાવી દેવામાં આવતા હોવાનું પોલીસનું કહેવું છે.
પોલીસે બંનેની નિશાનદેહી પરથી કુલ ૨૮ ચોરીના વાહનો કબજે કર્યા છે. હાલમાં આ તમામ વાહનો કયા પોલીસ સ્ટેશન વિસ્તારોથી ચોરાયા હતા તેની ચકાસણી ચાલી રહી છે. સાથે જ ચોરાયેલા વાહનોનો ઉપયોગ કેવી રીતે થતો હતો અને તેને ક્યાં વેચવાના હતા તે સહિતના તમામ મુદ્દાઓની તપાસ હાથ ધરવામાં આવી છે.
પોલીસે કેસમાં કાયદેસરની કાર્યવાહી શરૂ કરી છે. સગીરને ગુનાહિત પ્રવૃત્તિમાં સામેલ કરવાના મુદ્દે પણ તપાસ ચાલી રહી છે અને સમગ્ર મામલે વધુ પુરાવા એકત્રિત કરવામાં આવી રહ્યા છે.
