Last Updated on by Sampurna Samachar
ઈરાન-અમેરિકા તણાવ: પુતિને આપ્યો ઈરાનને સાથ
અરાઘચીએ રશિયાને વિશ્વની સાચી મહાશક્તિ ગણાવી બંને દેશો વચ્ચેની વ્યૂહનીતિને વધુ મજબૂત કરવાની વાત પર ભાર મૂક્યો છે
(સંપૂર્ણ સમાચાર સેવા)
આ મુલાકાત દરમિયાન પુતિને ઈરાનને દરેક રીતે સાથ આપવાનો ભરોસો આપ્યો છે. રશિયાનું સમર્થન મળતા જ ઈરાનના તેવર બદલાયા છે અને અરાઘચીએ અમેરિકા પર આકરા પ્રહારો કરતા કહ્યું કે અમેરિકા ઈરાન સામેના યુદ્ધમાં ખરાબ રીતે નિષ્ફળ ગયું છે. એટલું જ નહીં, તેમણે એવો દાવો પણ કર્યો કે હવે ડોનાલ્ડ ટ્રમ્પ પોતે ઈરાન સાથે વાતચીત કરવા માટે આજીજી કરી રહ્યા છે.
અરાઘચીએ રશિયાને વિશ્વની સાચી મહાશક્તિ ગણાવી બંને દેશો વચ્ચેની વ્યૂહનીતિને વધુ મજબૂત કરવાની વાત પર ભાર મૂક્યો છે.અમેરિકા અને ઈરાન વચ્ચેની શાંતિ મંત્રણા હાલમાં ખોરવાઈ ગઈ છે, જેના માટે અરાઘચીએ ટ્રમ્પ સરકારની અયોગ્ય શરતોને જવાબદાર ગણાવી છે. ઈરાને પાકિસ્તાન દ્વારા અમેરિકાને એક લેખિત પત્ર મોકલ્યો છે, જેમાં પરમાણુ કાર્યક્રમ અને હોર્મુઝ સ્ટ્રેટ અંગે પોતાની અંતિમ શરતો સ્પષ્ટ કરી દીધી છે.
સૌથી વધુ આર્થિક અસર ખાડી દેશો પર પડી
ઈરાને યુદ્ધ રોકવા માટે એક નવો પ્રસ્તાવ પણ મૂક્યો છે, જે મુજબ હોર્મુઝ સ્ટ્રેટનો દરિયાઈ માર્ગ ફરીથી ખોલવા અને ત્યાંથી અમેરિકન નૌકાદળની નાકાબંધી હટાવવાની માંગ કરવામાં આવી છે. બીજી તરફ, અમેરિકન પ્રમુખ ટ્રમ્પે તેમના દૂતોની મુલાકાત રદ કરી દીધી છે અને સાફ શબ્દોમાં કહ્યું છે કે જો ઈરાન ખરેખર વાતચીત કરવા માંગતું હોય, તો તે સીધો અમારો સંપર્ક કરી શકે છે.
આ સંઘર્ષની સૌથી વધુ આર્થિક અસર ખાડી દેશો પર પડી રહી છે. હોર્મુઝ સ્ટ્રેટ બંધ થવાને કારણે આ દેશોના ઓઇલ અને ગેસ ઇન્ફ્રાસ્ટ્રક્ચરને ભારે નુકસાન થયું છે. આ પરિસ્થિતિમાં યુનાઇટેડ આરબ એમિરેટ્સના પ્રમુખના સલાહકાર અનવર ગરગશે અન્ય ખાડી દેશોની ટીકા કરતા જણાવ્યું છે કે ઈરાન પ્રત્યે તેમનું વલણ ઘણું નબળું રહ્યું છે અને ઈરાનને રોકવાની નીતિ ખરાબ રીતે નિષ્ફળ ગઈ છે. એક તરફ શાંતિ માટે રાજદ્વારી પ્રયાસો તેજ થયા છે, તો બીજી તરફ લેબેનોન સરહદે ઈઝરાયલ અને હિઝબુલ્લાહ વચ્ચે યુદ્ધવિરામ છતાં હિંસા ચાલુ રહેતા સ્થિતિ તણાવપૂર્ણ બની રહી છે.
