Last Updated on by Sampurna Samachar
કચ્છમાં ખાવડા પાર્ક રોડ પર ભયાનક અકસ્માત
અકસ્માતને પગલે ટ્રાફિક જામ સર્જાયુ હતુ
(સંપૂર્ણ સમાચાર સેવા)
કચ્છમાં ખાવડા રીન્યુએબલ એનર્જી પાર્ક તરફ જતા રોડ પર એક અત્યંત ભયાનક અને કાળજું કંપાવી દેનારો માર્ગ અકસ્માત સર્જાયો હતો. અહીં પવનચક્કીના મોટા પાંખિયા કે પાર્ટ્સ લઈ જતા એક વિશાળ ટ્રેલર અને પૂરપાટ ઝડપે આવી રહેલા ડમ્પર વચ્ચે જોરદાર ટક્કર થઈ હતી. આ ગમખ્વાર અકસ્માતમાં એક વ્યક્તિનું ઘટનાસ્થળે જ કમકમાટીભર્યું મોત નીપજ્યું હતુ જેને પગલે હાઇવે પર ભારે અફરાતફરી મચી ગઈ હતી.
મળતી માહિતી મુજબ ખાવડા હાઇવે પર પવનચક્કીના સેગમેન્ટ ભરેલા ટ્રેલર સાથે ડમ્પર એટલી જોરદાર ઝડપે અથડાયું હતું કે તેનો પ્રચંડ અવાજ દૂર-દૂર સુધી સંભળાયો હતો. ટક્કર એટલી ઘાતકી હતી કે ડમ્પરની આગળની આખી કેબિન લોખંડના કાટમાળમાં ફેરવાઈ ગઈ હતી અને તેનો કુરચો બોલી ગયો હતો. અકસ્માતને પગલે રસ્તાની બંને બાજુએ વાહનોની લાંબી કતારો લાગી ગઈ હતી અને ટ્રાફિક જામની સ્થિતિ સર્જાઈ હતી.
ખાવડા પોલીસે અકસ્માત મોતનો ગુનો નોંધ્યો
આ ભયાનક દુર્ઘટના અંગે આસપાસના લોકોએ તાત્કાલિક સ્થાનિક પોલીસને જાણ કરી હતી. માહિતી મળતાં જ પશ્ચિમ કચ્છની ખાવડા પોલીસ સ્ટેશનનો કાફલો તાકીદે ઘટનાસ્થળે દોડી આવ્યો હતો. પોલીસે સ્થાનિકોની મદદથી મૃતદેહને બહાર કાઢી પોસ્ટમોર્ટમ અર્થે હોસ્પિટલ ખસેડ્યો હતો. ખાવડા પોલીસે આ મામલે અકસ્માત મોતનો ગુનો નોંધીને કાયદેસરની આગળની તપાસ હાથ ધરી હતી.
