માનસિક તણાવમાં મિસ પુડ્ડુચેરી ૨૫ વર્ષીય મોડેલે આત્મહત્યા કરી

Last Updated on 15/07/2025 by Sampurna Samachar

ડિપ્રેશનમાં તેણીએ ઉંઘની ગોળીનુ વધુ સેવન કર્યું

પિતાએ હોસ્પિટલમાં કરી હતી દાખલ

(સંપૂર્ણ સમાચાર સેવા)

એન્ટરટેઈનમેન્ટ ઈન્ડસ્ટ્રીમાંથી એક દુ:ખદ સમાચાર સામે આવ્યા છે. ૨૫ વર્ષીય મોડેલ અને મિસ પુડ્ડુચેરી સેન રેચલે જીવન ટુંકાવ્યાના સમાચાર સામે આવ્યા છે. નિધનથી ઈન્ડસ્ટ્રીમાં શોકનું મોજું ફરી વળ્યું છે. ચાહકોએ સેનના મૃત્યુ પર શોક વ્યક્ત કર્યો છે અને તેના આત્માને શાંતિ મળે તે માટે પ્રાર્થના કરી છે. તમને જણાવી દઈએ કે, રેચલ રંગભેદ સામે એક મજબૂત અવાજ તરીકે ઉભરી આવી હતી.

સેને ૨૦૨૧માં મિસ પુડ્ડુચેરીનો ખિતાબ જીત્યો હતો. સેનનું રિયલ નામ શંકર પ્રિયા હતું. તેણે બાળપણમાં જ પોતાની માતાને ગુમાવી દીધા હતા. માતાના મૃત્યુ બાદ તેના પિતાએ સેનની સંભાળ રાખી હતી. તેના પિતાએ તેને મોડેલિંગ કરવા માટે મોટિવેટ કરી હતી.

પોલીસે કેસ નોંધી તપાસ હાથ ધરી

સેનને મોડેલિંગ કરિયરમાં પોતાની ડાર્ક સ્કીનના કરાણે ઘણી મુશ્કેલીઓનો સામનો કરવો પડ્યો હતો. તમામ પડકારોને પાર કરીને સેને ૨૦૧૯માં મિસ ડાર્ક ક્વીન તમિલનાડુ અને ૨૦૨૧માં મિસ પુડ્ડુચેરીનો ખિતાબ જીત્યો હતો. સેન રેચલે લંડન, જર્મની, ફ્રાન્સ સહિત ઘણા દેશોમાં મોડેલિંગ સ્પર્ધાઓમાં ભાગ લીધો હતો. તેણે મહિલાઓની સુરક્ષા માટે જાગૃતિ પણ ફેલાવી હતી.

સેન રેચલના તાજેતરમાં જ લગ્ન થયા હતા. પ્રાપ્ત માહિતી પ્રમાણે તે ડિપ્રેશનથી પીડાતી હતી. એક અહેવાલ પ્રમાણે ૫ જુલાઈના રોજ તણે ઊંઘની ગોળીઓનું વધુ સેવન કરી લીધુ હતું, ત્યારબાદ તેના પિતા તેને પુડ્ડુચેરી સરકારી હોસ્પિટલમાં લઈ ગયા હતા. ત્યારબાદ તેને એક ખાનગી હોસ્પિટલમાં દાખલ કરવામાં આવી હતી. જેના પછી સેનને જવાહરલાલ ઈન્સ્ટિટ્યૂટ ઓફ પોસ્ટગ્રેજ્યુએટ મેડિકલ એજ્યુકેશન એન્ડ રિસર્ચમાં લઈ જવામાં આવી હતી, જ્યાં તેણે અંતિમ શ્વાસ લીધા છે. આ મામલે ઉરુલૈયનપેટ્ટાઈ પોલીસે કેસ નોંધીને તપાસ હાથ ધરી છે.