Last Updated on by Sampurna Samachar
ચાંદલોડિયામાં નવા રોડના પ્રોજેક્ટ માટે AMC ની ડિમોલિશન કામગીરી
વહેલી સવારે AMC ની ટીમો JCB અને બુલડોઝર સાથે ત્રાટકી
(સંપૂર્ણ સમાચાર સેવા)
અમદાવાદમાં ટ્રાફિકની સમસ્યા નિવારવા અને નવા રસ્તાઓના નેટવર્કને મજબૂત કરવા માટે અમદાવાદ મ્યુનિસિપલ કોર્પોરેશન એક્શન મોડમાં આવ્યું છે. અમદાવાદના પશ્ચિમ ઝોનમાં આવેલા ચાંદલોડિયા વિસ્તારના મહાદેવનગરમાં મ્યુનિસિપલ કોર્પોરેશનની ટાઉન પ્લાનિંગ શાખા દ્વારા મેગા ડિમોલેશન ડ્રાઈવ શરૂ કરવામાં આવી હતી. આ વિસ્તારમાં નવા પ્લાન થયેલા રોડના આયોજનમાં અડચણરૂપ બનતા અનેક ગેરકાયદેસર બાંધકામોને તોડી પાડવા માટે AMC ની ટીમો JCB અને બુલડોઝર સાથે ત્રાટકી હતી.
વાત કરીએ તો કોર્પોરેશનની ટીમે કાચા-પાકા મકાનો અને ગેરકાયદેસર શેડ તોડવાની પ્રક્રિયા શરૂ કરી, કે તુરંત જ સ્થાનિક રહીશો અને મહિલાઓ મોટી સંખ્યામાં રસ્તા પર ઉતરી આવ્યા હતા. વર્ષો જૂના આશરા છીનવાઈ જતાં લોકોમાં વહીવટી તંત્ર સામે ભારે રોષ અને આક્રંદ જોવા મળ્યો હતો.
સ્થળ પર પોલીસ પ્રોટેક્શન મંગાવાયુ હતુ
સ્થાનિકોએ ભેગા મળીને તંત્રની આ કામગીરીનો ઉગ્ર વિરોધ કર્યો હતો અને “પહેલા અમને વૈકલ્પિક મકાન આપો, પછી અમારા ઘર તોડો” તેવા સૂત્રોચ્ચાર કરીને કામગીરી રોકવાનો પ્રયાસ કર્યો હતો. લોકોનો આક્ષેપ છે કે ચોમાસાની ઋતુ નજીક આવી રહી છે/ચાલુ છે ત્યારે વૈકલ્પિક વ્યવસ્થા કર્યા વિના જ ઘર તોડી પડાતા અનેક ગરીબ પરિવારો ખુલ્લા આકાશ નીચે આવી ગયા છે.
કોઈ અનિચ્છનીય ઘટના ન બને અને કાયદો-વ્યવસ્થાની સ્થિતિ વણસે નહીં તે માટે AMC દ્વારા અગાઉથી જ પોલીસ પ્રોટેક્શન મંગાવવામાં આવ્યું હતું. સ્થાનિક પોલીસ સ્ટેશનના ઉચ્ચ અધિકારીઓ સહિત મોટી સંખ્યામાં પોલીસ જવાનો અને એસઆરપીના જવાનો સ્થળ પર તૈનાત કરી દેવાયા હતા. આ ઉપરાંત, ઈમરજન્સી સ્થિતિને પહોંચી વળવા માટે ફાયર બ્રિગેડની ટીમો પણ વોટર બ્રાઉઝર સાથે ગ્રાઉન્ડ ઝીરો પર હાજર રહી હતી.
ભારે હોબાળા અને વિરોધ વચ્ચે પણ પોલીસે પ્રદર્શનકારીઓને હટાવીને એએમસીની ટીમને સુરક્ષા પૂરી પાડી હતી, જેના કારણે નવા રોડના માર્ગમાં આવતા તમામ નાના-મોટા દબાણોને સંપૂર્ણપણે દૂર કરી રસ્તો ખુલ્લો કરવામાં આવ્યો હતો.
