Last Updated on by Sampurna Samachar
કુલ ૮ શખ્સોને રંગેહાથ ઝડપી લીધા પોલીસે
૧૧.૪૫ લાખથી વધુની કિંમતનો મુદ્દામાલ જપ્ત કરાયો
(સંપૂર્ણ સમાચાર સેવા)
સાબરકાંઠા જિલ્લામાં લોકલ ક્રાઇમ બ્રાન્ચ દ્વારા વધુ એક સફળ ઓપરેશન પાર પાડવામાં આવ્યું છે. સાબરકાંઠા એલસીબીની ટીમને ગામભોઈ વિસ્તારમાં મોટા પાયે જુગારધામ ચાલી રહ્યું હોવાની એક ચોક્કસ અને ખાનગી બાતમી મળી હતી. આ બાતમીના આધારે ઉચ્ચ અધિકારીઓના માર્ગદર્શન હેઠળ પોલીસે આયોજનબદ્ધ રીતે રેડની કાર્યવાહી હાથ ધરી હતી.
સાબરકાંઠા LCB ની ટીમે ગામભોઈ વિસ્તારમાં આવેલા એક બંધ મકાનને નિશાન બનાવી ત્યાં ઓચિંતી રેડ કરી હતી. બહારથી બંધ દેખાતા આ મકાનની અંદર ગંજીપાના વડે હાર-જીતનો મોટો જુગાર રમાડવામાં આવી રહ્યો હતો. પોલીસની અચાનક એન્ટ્રી થતાં જ ત્યાં હાજર જુગારીઓમાં ભારે નાસભાગ મચી ગઈ હતી. જોકે, પોલીસે કોર્ડન કરીને જુગાર રમતા અને રમાડતા કુલ ૮ શખ્સોને રંગેહાથ ઝડપી લીધા હતા.
ગામભોઈ પોલીસ મથકે ગુનો દાખલ
પોલીસે ઘટના સ્થળેથી જુગારના પટમાંથી મોટી માત્રામાં રોકડ રકમ, મોબાઈલ ફોન તેમજ જુગારીઓએ અવરજવર માટે ઉપયોગમાં લીધેલી ૩ આલીશાન કાર અને ૧ બાઈક સહિતનો તમામ સામાન કબજે લીધો છે. એલસીબીએ આ રેડ દરમિયાન કુલ રૂપિયા ૧૧.૪૫ લાખથી વધુની કિંમતનો મુદ્દામાલ જપ્ત કર્યો હતો. મુખ્ય સૂત્રધાર સહિત પકડાયેલા તમામ ૮ આરોપીઓ સામે ગામભોઈ પોલીસ મથકે ગુનો દાખલ કરવામાં આવ્યો છે.
સાબરકાંઠા એલસીબી દ્વારા અવારનવાર કરવામાં આવતી આ પ્રકારની કડક કાર્યવાહીના કારણે જિલ્લાભરમાં ગેરકાયદે જુગારની પ્રવૃત્તિ ચલાવતા તત્વોમાં ભારે ફફડાટ વ્યાપી ગયો છે. સ્થાનિક રહીશોએ પોલીસની આ સફળ કામગીરીને બિરદાવી છે. પોલીસે ગુનો નોંધીને આ જુગારધામ કેટલા સમયથી ચાલતું હતું અને તેમાં અન્ય કોઈ મોટા માથાઓ સામેલ છે કે કેમ, તે દિશામાં આગળની તપાસ શરૂ કરી છે.
