Last Updated on by Sampurna Samachar
ED એ કાર્યવાહીના ભાગરૂપે ૪ કરોડની હવેલી ટાંચમા લીધી
સોશિયલ મીડિયા પર ED ની આ કાર્યવાહીને ખોટી ઠેરવી
(સંપૂર્ણ સમાચાર સેવા)
એન્ફોર્સમેન્ટ ડાયરેક્ટોરેટના પંજાબમાં કોંગ્રેસ ધારાસભ્ય સુખપાલ ખૈરાના ઘરે દરોડા પાડવામાં આવ્યા હતા. ભોલાથ બેઠક પરથી ધારાસભ્ય ખૈરા પર ડ્રગ તસ્કરો પાસેથી લેણ-દેણનો આરોપ મૂકવામાં આવ્યો છે. ED એ કાર્યવાહીના ભાગરૂપે ચંદીગઢ સેક્ટર-૫ની હવેલી ટાંચમાં લીધી છે. જેની કિંમત રૂ. ૩.૮૨ કરોડ છે. ખૈરાએ ડ્રગ તસ્કર ગુરદેવ સિંહ સાથે સોદો કર્યો હોવાનો આરોપ છે. ED એ સોશિયલ મીડિયા પર આ અંગે માહિતી આપી હતી. કોંગ્રેસ ધારાસભ્ય ખૈરા પર પ્રિવેન્શન ઓફ મની લોન્ડરિંગ એક્ટ ૨૦૦૨ની જોગવાઈઓ હેઠળ કેસ નોંધ્યો હતો.
૨૦૧૫ના ફાઝિલ્કા જિલ્લામાં NDPS એક્ટ હેઠળ આ દરોડા પાડવામાં આવ્યા હતા. ૨૮ સપ્ટેમ્બર, ૨૦૨૩ના રોજ ખૈરાની ચંદીગઢ સ્થિત નિવાસ સ્થાનેથી ધરપકડ થઈ હતી. ED એ જણાવ્યું કે, પંજાબ પોલીસ દ્વારા હાથ ધરવામાં આવેલી તપાસમાં ગુરદેવ સિંહ પાસેથી કુલ ૧૮૦૦ ગ્રામ હેરોઈન, એક ૩૧૫ બોર પિસ્તોલ અને બે કારતૂસ, ૨ પાકિસ્તાની સીમકાર્ડ, એક ૩૨ બોર પિસ્તોલ અને ૨૪ બુલેટ્સ, ૨૪ સોનાના બિસ્કિટ જપ્ત કર્યા હતા.
ED કે કોઈ અન્ય સરકારી સ્રોતોએ મને નોટિસ આપી નહતી
ફાઝિલ્કા કોર્ટે પોતાના આદેશમાં ગુરદેવ સિંહ ઉપરાંત અન્ય આઠની એનડીપીએસ એક્ટ, ૧૯૮૫ની વિવિધ કલમ હેઠળ દોષિત ઠેરવ્યા હતાં. ઈડીની તપાસમાં ખુલાસો થયો કે, સુખપાલ સિંહ ખૈરાએ આંતરરાષ્ટ્રીય ડ્રગ સિંડિકેટ દ્વારા ગુરદેવ સિંહ અને તેના વિદેશી સહયોગીઓ પાસેથી પ્રાપ્ત રૂ. ૩.૮૨ કરોડ મેળવ્યા હતા. જેનો ઉપયોગ ચૂંટણી પ્રચારમાં કર્યો હતો.
સુખપાલ ખૈરાએ ફેસબુક પર પોસ્ટ કરી ED ની આ કાર્યવાહીને ખોટી ઠેરવી છે. તેમણે કહ્યું કે, મને પણ મીડિયા પાસેથી જાણવા મળ્યું કે, ED એ મારૂ ચંદીગઢ સ્થિત ઘર ટાંચમાં લીધું છે. હું સ્પષ્ટતા કરૂ છું કે, મને આ અંગે કોઈ માહિતી નથી. ઈડી કે કોઈ અન્ય સરકારી સ્રોતોએ આ મામલે મને કોઈ નોટિસ આપી નથી. આ માહિતી મારા ચરિત્રના હનન સમાન છે. ભાજપ દેશમાં વિપક્ષ નેતાઓને ફસાવવા ઈડીનો ઉપયોગ કરી રહ્યું છે.
ખૈરાનું રાજકીય જીવન ઉતાર-ચડાવ વાળુ રહ્યું છે. ખૈરા કોંગ્રેસ છોડી આમ આદમી પાર્ટીમાં જોડાયો હતો. ૨૦૧૭માં તે આપની ટિકિટ પર ધારાસભ્ય બન્યા અને પક્ષે બાદમાં વિપક્ષ નેતા બનાવ્યા હતા. જોકે, આ દિવસો ટકી શક્યા નહીં. આમ આદમી પાર્ટીએ તેમને બરતરફ કર્યા હાત. જૂન, ૨૦૨૧માં ખૈરા કોંગ્રેસમાં જોડાયા અને કોંગ્રેસની ટિકિટ પર બે વખત ધારાસભ્ય બન્યા. કોંગ્રેસે સંગરૂર લોકસભા બેઠકમાંથી ખૈરાને ટિકિટ આપી હતી. પરંતુ તે જીતી શક્યા નહીં.
