Last Updated on by Sampurna Samachar
માઉન્ટ આબુ હાલ ચર્ચાનો વિષય બન્યો
આ મામલે સરકારની કોઇ પ્રતિક્રિયા નહીં
(સંપૂર્ણ સમાચાર સેવા)
માઉન્ટ આબુનું નામ બદલીને ‘અબુ રાજ તીર્થ‘ કરવાની માંગ થઈ રહી છે. મંત્રી ઓતારામ દેવાસીએ વિધાનસભામાં આ માંગણી કરી છે. તેને પવિત્ર સ્થળ ગણાવીને તેમણે ત્યાં માંસ અને દારૂના વેચાણ પર પ્રતિબંધ મૂકવાની પણ અપીલ કરી છે. જોકે, સરકાર આ અંગે શું કહી રહી તેની રાહ જોવામાં આવી રહી છે.
ગુજરાતીઓનું પ્રિય અને રાજસ્થાનનું પ્રખ્યાત પર્યટન સ્થળ માઉન્ટ આબુ આ દિવસોમાં ચર્ચાનો વિષય બન્યું છે. વિધાનસભામાં માઉન્ટ આબુનું નામ બદલવાનો મુદ્દો જોરશોરથી ઉઠાવવામાં આવ્યો હતો. રાજ્ય સરકારના મંત્રી ઓતારામ દેવાસીએ ગૃહમાં માઉન્ટ આબુ (MOUNT ABU) નું નામ બદલીને ‘અબુ રાજ તીર્થ‘ કરવાની માંગ કરી હતી. આ ઉપરાંત, તેને પવિત્ર તીર્થસ્થાન ગણાવીને, તેમણે ત્યાં માંસ અને દારૂના વેચાણ પર પ્રતિબંધ મૂકવાની પણ અપીલ કરી હતી.
સરકાર આ મામલે શુ પગલાં લેશે તે એક સવાલ
આ માંગણી બાદ રાજકીય અને સામાજિક વર્તુળોમાં ખળભળાટ મચી ગયો છે. હવે પ્રશ્ન એ થાય છે કે, શું સરકાર માઉન્ટ આબુનું નામ બદલવાનો વિચાર કરશે? રાજસ્થાનના કાશ્મીર તરીકે ઓળખાતું માઉન્ટ આબુ પ્રવાસીઓ માટે એક મુખ્ય આકર્ષણનું કેન્દ્ર છે.
દર વર્ષે મોટી સંખ્યામાં પ્રવાસીઓ આ માઉન્ટ આબુની મુલાકાત લે છે. તેમાં પણ મોટી સંખ્યામાં ગુજરાતના પ્રવાસીઓનો સમાવેશ થાય છે. આ દરમિયાન રાજસ્થાન સરકારના મંત્રી ઓતારામ દેવાસીએ વિધાનસભામાં નામ બદલવાનો મુદ્દો ઉઠાવ્યો અને કહ્યું કે, સિરોહી જિલ્લાનો આ પર્વત પ્રાચીન સમયથી સનાતન ધર્મની આસ્થાનું કેન્દ્ર રહ્યો છે.
તેમણે કહ્યું કે, પહેલા આ સ્થળ ‘અબુ રાજ તીર્થ‘ તરીકે જાણીતું હતું, પરંતુ પાછળથી તેનું નામ બદલીને માઉન્ટ આબુ રાખવામાં આવ્યું હતું. મંત્રી ઓતારામ દેવાસીએ વિધાનસભાના સત્ર દરમિયાન માંગ ઉઠાવી હતી. તેમણે સરકાર સામે આ પ્રસ્તાવ મુક્યો હતો. આ દરમિયાન તેમણે જણાવ્યું હતું કે, ‘ અબુ રાજ તીર્થ એક પવિત્ર સ્થળ છે અને ૩૩ કરોડ દેવી-દેવતાઓનું ઘર છે. તેથી તેને ફરીથી તેના પ્રાચીન નામથી ઓળખવું જોઈએ.‘
ગૃહમાં મંત્રી ઓતારામ દેવાસીએ માઉન્ટ આબુનું નામ બદલવાની સાથે ત્યાં માંસ અને દારૂના વેચાણ પર પ્રતિબંધ મૂકવાની અપીલ કરી હતી. તેમણે કહ્યું કે, ગુરુ શિખર, દેલવારા જૈન મંદિર, અર્બુદા માતા મંદિર, ભગવાન દત્તાત્રેય મંદિર સહિત ઘણા ધાર્મિક સ્થળો અહીં આવેલા છે.
આવી સ્થિતિમાં, આ સ્થળને પવિત્ર તીર્થસ્થાન જાહેર કરવું જોઈએ. મંત્રીએ કહ્યું કે, માઉન્ટ આબુમાં ખુલ્લેઆમ દારૂ અને માંસ વેચાય છે, જે ભક્તોની ભાવનાઓને ઠેસ પહોંચાડે છે. તેથી, આવી પ્રવૃત્તિઓ પર સખત પ્રતિબંધ મૂકવો જોઈએ. જણાવી દઈએ કે, માઉન્ટ આબુનું નામ બદલવા અને દારૂ અને માંસના વેચાણ પર પ્રતિબંધ મૂકવાની માંગ પર હવે સરકારના પ્રતિભાવની રાહ જોવાઈ રહી છે.
