Last Updated on by Sampurna Samachar
શાકાહારી પરિવારને નોનવેજ ફૂડ પીરસાતાં હોબાળો
ભોગ બનનાર ગ્રાહકો ચુસ્ત સ્વામિનારાયણ સંપ્રદાયના
(સંપૂર્ણ સમાચાર સેવા)
આણંદ શહેરમાં આવેલી જાણીતી ફાસ્ટ ફૂડ ચેઈન મેકડોનાલ્ડ્સની મોટી બેદરકારી સામે આવી છે. PVR સિનેમા સ્થિત મેકડોનાલ્ડ્સના આઉટલેટ પર ગ્રાહકોને ભારે બેદરકારીનો સામનો કરવો પડ્યો હતો. અહીં વેજ ઓર્ડરના બદલે ગ્રાહકોને ચિકન નગેટ્સ પીરસી દેવામાં આવ્યા હોવાનો ગંભીર આક્ષેપ થયો છે. આ ઘટનાનો એક વીડિયો હાલ સોશિયલ મીડિયા પર વાયરલ થઈ રહ્યો છે, જેને પગલે ફાસ્ટ ફૂડ પ્રેમીઓ અને સ્થાનિક લોકોમાં ભારે રોષ જોવા મળ્યો હતો.
મળતી માહિતી મુજબ, આ ઘટનાનો ભોગ બનનાર ગ્રાહકો ચુસ્ત સ્વામિનારાયણ સંપ્રદાયના અનુયાયીઓ હતા. ધાર્મિક માન્યતાઓ અને પવિત્રતા જાળવતા આ પરિવારે મેકડોનાલ્ડ્સમાંથી વેજ ફૂડનો ઓર્ડર આપ્યો હતો, પરંતુ કર્મચારીઓની ઘોર બેદરકારીના કારણે તેમને ચિકન નગેટ્સ આપી દેવાયા હતા.
જાણીતી બ્રાન્ડ્સની ગુણવત્તા અને ચોકસાઈ સામે સવાલો ઉઠ્યા
આ ગંભીર મિક્સઅપના કારણે ગ્રાહકોની ધાર્મિક લાગણીને ઊંડો આઘાત લાગ્યો છે. વધુમાં, ગ્રાહકોએ જ્યારે આ અંગે ત્યાંના સ્ટાફ અને મેનેજમેન્ટને રજૂઆત કરી, ત્યારે તેમને કોઈ સંતોષકારક જવાબ કે ભૂલનો સ્વીકાર જોવા મળ્યો ન હતો, જેના કારણે વિવાદ વધુ વકર્યો હતો.
આ સમગ્ર ઘટનાનો વીડિયો સોશિયલ મીડિયા પ્લેટફોર્મ્સ પર વાયરલ થતાં લોકો મેકડોનાલ્ડ્સની કામગીરી સામે ફિટકાર વર્ષાવી રહ્યા છે. શાકાહારી ગ્રાહકો હવે આ જાણીતી બ્રાન્ડ્સની ગુણવત્તા અને ચોકસાઈ સામે સવાલો ઉઠાવી રહ્યા છે.
વાયરલ વીડિયોના માધ્યમથી સનાતની અને શાકાહારી ગ્રાહકોને એક ચેતવણીભર્યો સંદેશ પણ આપવામાં આવી રહ્યો છે કે, કોઈપણ ફાસ્ટ ફૂડ આઉટલેટ પર કંઈપણ આરોગતા પહેલા તે વેજ છે કે નોનવેજ તેની ચોકસાઈપૂર્વક તપાસ કરી લેવી જરૂરી છે, જેથી આવી ગંભીર ભૂલોથી બચી શકાય.
