પ્રયાગરાજમાં ‘ડિજિટલ મહાકુંભ અનુભૂતિ કેન્દ્ર’નું ભ્રમણ કરી
(સંપૂર્ણ સમાચાર સેવા)
ભૂતાનના રાજા જિગ્મે ખેસર નામગ્યાલ વાંગચુક પ્રયાગરાજ મહાકુંભમાં સંગમમાં આસ્થાની ડૂબકી લગાવી હતી. આ દરમિયાન તેમની સાથે ઉત્તર પ્રદેશના મુખ્યમંત્રી યોગી આદિત્યનાથ પણ હાજર રહ્યા હતા. મુખ્યમંત્રી યોગીએ ખુદ ભૂતાન કિંગ સાથે ડૂબકી લગાવતી તસવીર સોશિયલ મીડિયા પર શેર કરી છે. તસવીરોમાં મુખ્યમંત્રી યોગી સાથે ભૂતાન કિંગ પણ સંપૂર્ણ રીતે ભગવા રંગમાં જોવા મળી રહ્યાં છે.
યોગી આદિત્યનાથે પ્રયાગરાજને તીર્થસ્થળોનો રાજા જણાવતો એક સંસ્કૃત શ્લોક પણ સાથે લખ્યો છે. મુખ્યમંત્રી યોગીએ સોશિયલ મીડિયામાં લખ્યું કે, ‘મહાકુંભ-૨૦૨૫, પ્રયાગરાજમાં ભૂતાનના મહામહિમ નરેશ જીગ્મે ખેસર નામગ્યાલ વાંગચુકે પવિત્ર ત્રિવેણી સંગમમાં પાવન સ્નાન કરી પુણ્ય પ્રાપ્ત કર્યું’.
ભૂતાન કિંગે માં ગંગાની પૂજા-અર્ચના કરી અને અક્ષય વટ અને સૂતા હનુમાનજીના દર્શન અને પૂજન પણ કર્યું. ત્યારબાદ તેઓએ પ્રયાગરાજમાં ‘ડિજિટલ મહાકુંભ અનુભૂતિ કેન્દ્ર’નું ભ્રમણ કરી મહાકુંભના દિવ્ય-ભવ્ય અને ડિજિટલ સ્વરૂપનું અવલોકન કર્યું.
ભૂતાનના રાજા જિગ્મે ખેસર નામગ્યાલ વાંગચુક ઉત્તર પ્રદેશની રાજધાની લખનૌ પહોંચ્યા. ચૌધરી ચરણ સિંહ ઈન્ટરનેશનલ એરપોર્ટ પર યોગી આદિત્યનાથે વાંગચુકનું સ્વાગત કર્યું. અહીં કલાકારોએ ભૂતાન નરેશ માટે સાંસ્કૃતિક પ્રસ્તુતિ પણ કરી. લખનૌ સ્થિત રાજભવનમાં ભૂતાનના રાજાના સન્માનમાં એક રાત્રી ભોજનું પણ આયોજન કરવામાં આવ્યું. જેમાં ભૂતાનના પ્રતિનિધિમંડળ, ભારત સરકાર અને યુપી સરકારના પ્રમુખ અધિકારીઓ અને વિશેષ અતિથિઓએ ભાગ લીધો