આર્મી ચીફે બલુચિસ્તાનના મુખ્યમંત્રી સરફરાઝ બુગતીની મુલાકાત લીધી
(સંપૂર્ણ સમાચાર સેવા)
પાકિસ્તાનના બલુચિસ્તાનમાં આતંકવાદીઓ અને સેના વચ્ચે એક મોટી અથડામણ થઈ હતી. જેમાં ૨૩ આતંકવાદીઓ અને ૧૮ સુરક્ષા કર્મચારીઓ માર્યા ગયા છે. અશાંત પ્રાંતમાં ચાલી રહેલી અથડામણો વચ્ચે આર્મી ચીફ જનરલ સૈયદ અસીમ મુનીરે બલુચિસ્તાનની મુલાકાત લીધી.
અહેવાલ મુજબ, સેના પ્રમુખને પ્રાંતની વર્તમાન સુરક્ષા પરિસ્થિતિ વિશે વિગતવાર માહિતી આપવામાં આવી હતી. તેમની સાથે વરિષ્ઠ સુરક્ષા અને ગુપ્તચર અધિકારીઓ પણ હાજર હતા. પાકિસ્તાન આર્મીની મીડિયા વિંગ, ઇન્ટર-સર્વિસિસ પબ્લિક રિલેશન્સ અનુસાર, આર્મી ચીફે બલુચિસ્તાનના મુખ્યમંત્રી સરફરાઝ બુગતી અને ગવર્નર શેખ જાફર ખાન મંડોખૈલને મળ્યા. તેમણે માર્યા ગયેલા સૈનિકોના અંતિમ સંસ્કારમાં પ્રાર્થના કરી અને ક્વેટાની સંયુક્ત લશ્કરી હોસ્પિટલ ખાતે ઘાયલ સૈનિકોની મુલાકાત લીધી.
જનરલ મુનીરે કહ્યું, ‘આ કહેવાતા કટ્ટરપંથીઓ કંઈ પણ કરી શકે છે, પરંતુ આપણા ગૌરવશાળી રાષ્ટ્ર અને તેના સશસ્ત્ર દળો દ્વારા તેમનો પરાજય થશે.’ બલુચિસ્તાન પ્રાંતમાં આતંકવાદીઓ અને સુરક્ષા દળો વચ્ચે અલગ-અલગ એન્કાઉન્ટરની ઘટનાઓ બની હોવાનું જાણવા મળે છે. આમાં ૨૩ આતંકવાદીઓ માર્યા ગયા, પરંતુ ૧૮ સુરક્ષા કર્મચારીઓ પણ શહીદ થયા.
પાકિસ્તાની સેનાએ જણાવ્યું હતું કે છેલ્લા ૨૪ કલાકમાં અશાંત બલુચિસ્તાનના વિવિધ વિસ્તારોમાં આ આતંકવાદીઓને ઠાર કરવામાં આવ્યા હતા. શનિવારે હરનાઈ જિલ્લામાં આવા જ એક ઓપરેશનમાં, રાષ્ટ્રીય સૈનિકો અને આતંકવાદીઓ વચ્ચે થયેલી અથડામણમાં ૧૧ આતંકવાદીઓ માર્યા ગયા હતા અને અનેક આતંકવાદી ઠેકાણાઓનો નાશ કરવામાં આવ્યો હતો.
સુરક્ષા દળોએ પ્રાંતના કલાત જિલ્લાના મંગોચર વિસ્તારમાં આતંકવાદીઓ દ્વારા રસ્તો રોકવાના પ્રયાસને નિષ્ફળ બનાવ્યો. ઉપરાંત, ૧૨ આતંકવાદીઓ માર્યા ગયા. સેનાએ કહ્યું, ‘છેલ્લા ૨૪ કલાકમાં બલુચિસ્તાનમાં વિવિધ કાર્યવાહીમાં કુલ ૨૩ આતંકવાદીઓ માર્યા ગયા છે.’ સેનાએ કહ્યું કે સુરક્ષા દળો ફક્ત બલુચિસ્તાનમાંથી જ નહીં પરંતુ સમગ્ર પાકિસ્તાનમાંથી આતંકવાદને નાબૂદ કરવા માટે કટિબદ્ધ છે. જોકે, આ હુમલાની જવાબદારી તાત્કાલિક કોઈએ લીધી નથી. નિવેદન અનુસાર, ઓપરેશન દરમિયાન ૧૮ સુરક્ષા કર્મચારીઓ પણ માર્યા ગયા હતા. સેનાએ જણાવ્યું હતું કે ખૈબર પખ્તુનખ્વાના વિવિધ વિસ્તારોમાં પાંચ કાર્યવાહીમાં ૧૦ આતંકવાદીઓને ઠાર કરવામાં આવ્યા છે.