Last Updated on by Sampurna Samachar
ગોળીબારની આડમાં આતંકવાદીઓ કરવા માંગતા હતા ઘૂસણખોરી
પાકિસ્તાન સામે કાર્યવાહી કરવા થઇ ચર્ચા
(સંપૂર્ણ સમાચાર સેવા)
ભારત સાથેના તણાવ વચ્ચે પાકિસ્તાન પોતાની રમત રમી રહ્યું છે. એક તરફ, તેની સેના નિયંત્રણ રેખા પર સ્થિત વિસ્તારોમાં બોમ્બમારો કરી રહી છે તો બીજી તરફ આતંકવાદી જૂથો ઘૂસણખોરીનો પ્રયાસ કરી રહ્યા છે. પરંતુ સરહદ પર તૈનાત આપણા સૈનિકો તેમની દરેક કાર્યવાહીનો યોગ્ય જવાબ આપી રહ્યા છે.
જે આ સંદર્ભમાં, કેન્દ્રીય ગૃહમંત્રી અમિત શાહે તેમના નિવાસસ્થાને BSF , CISF ના ડાયરેક્ટર જનરલ સાથે પાકિસ્તાન સાથેની સરહદ અને એરપોર્ટ પર સુરક્ષાની સમીક્ષા કરવા માટે ઉચ્ચ સ્તરીય બેઠકની અધ્યક્ષતા કરી હતી. આ બેઠકમાં કેન્દ્રીય ગૃહ સચિવ ગોવિંદ મોહન, ગુપ્તચર બ્યુરોના ડિરેક્ટર તપન ડેકા અને રાષ્ટ્રીય સુરક્ષા સલાહકાર (NSA) અજિત ડોભાલ પણ હાજર હતા.
સૈનિકોએ ઘૂસણખોરીના પ્રયાસને નિષ્ફળ બનાવ્યો
હકીકતમાં, બોર્ડર સિક્યુરિટી ફોર્સ (BSF) એ કહ્યું હતું કે, તેણે જમ્મુમાં ભારત-પાકિસ્તાન આંતરરાષ્ટ્રીય સરહદ પાર કરીને ઘૂસણખોરીનો પ્રયાસ કરી રહેલા મસૂદ અઝહરના નેતૃત્વ હેઠળના સાત જૈશ આતંકવાદીઓને ઠાર માર્યા હતા અને પાકિસ્તાન રેન્જર્સની એક ચોકીનો પણ નાશ કર્યો હતો. રાત્રે ૧૧ વાગ્યાની આસપાસ સાંબા જિલ્લામાં સુરક્ષા દળો આતંકવાદીઓ સાથે સામસામે આવી ગયા, જ્યારે દેખરેખ રાખતા BSF ના જવાનોએ આતંકવાદીઓના “મોટા જૂથ” ને જોયું હતું.
BSF ના પ્રવક્તાએ જણાવ્યું હતું કે, ઘૂસણખોરીના પ્રયાસને પાકિસ્તાન રેન્જર્સની ધાંધર પોસ્ટ દ્વારા સમર્થન આપવામાં આવ્યું હતું, જેના ગોળીબારની આડમાં આતંકવાદીઓ ઘૂસણખોરી કરવા માંગતા હતા. તેમણે કહ્યું કે, સૈનિકોએ ઘૂસણખોરીના પ્રયાસને નિષ્ફળ બનાવ્યો, ઓછામાં ઓછા સાત આતંકવાદીઓને મારી નાખ્યા અને ધંધાર ચોકીને ભારે નુકસાન પહોંચાડ્યું હતું.
અધિકારીઓએ જણાવ્યું હતું કે, આ કાર્યવાહીમાં વધુ આતંકવાદીઓ માર્યા જવાની શક્યતા છે. BSF એ ઉપરોક્ત પોસ્ટ પર ગોળીબાર અને બંકરના ‘વિનાશ‘ની ‘થર્મલ ઇમેજર ક્લિપ‘ પણ શેર કરી, જ્યાં રેન્જર્સની હેવી મશીનગન મૂકવામાં આવી હતી. આવી સ્થિતિમાં, અમિત શાહની અર્ધલશ્કરી દળના વડા સાથેની મુલાકાત ખૂબ જ મહત્વપૂર્ણ માનવામાં આવી રહી છે.
સૂત્રોએ જણાવ્યું હતું કે, ભારત-પાકિસ્તાન સરહદ પર સુરક્ષા પરિસ્થિતિની સમીક્ષા કરવા ઉપરાંત, શાહે દેશભરના એરપોર્ટ પર સુરક્ષા વધારવા માટે લેવામાં આવેલા પગલાંનો પણ અભ્યાસ કર્યો હતો. સરહદ સુરક્ષા દળ ભારત-પાકિસ્તાન સરહદનું રક્ષણ કરે છે અને સેન્ટ્રલ ઇન્ડસ્ટ્રિયલ સિક્યુરિટી ફોર્સ (CISF) દેશના એરપોર્ટ, મેટ્રો નેટવર્ક અને અન્ય મહત્વપૂર્ણ સ્થાપનોની સુરક્ષા માટે જવાબદાર છે.
