Last Updated on by Sampurna Samachar
બંને ટોચના નેતાઓ વચ્ચે લગભગ ૫૦ સેકન્ડ સુધી વાતચીત
ફ્રાન્સમાં યોજાયેલ G-7 સમિટમાં થઇ મુલાકાત
(સંપૂર્ણ સમાચાર સેવા)
વડાપ્રધાન નરેન્દ્ર મોદી અને અમેરિકી રાષ્ટ્રપ્રમુખ ડોનાલ્ડ ટ્રમ્પ વચ્ચે ૧૬ મહિના બાદ G-7 સમિટમાં મુલાકાત થઇ હતી. વાત કરીએ તો બંને નેતાઓ વચ્ચે ફ્રાન્સના એવિયન શહેરમાં આ મુલાકાત થઈ હતી, જ્યાં તેઓ G-7 સમિટમાં ભાગ લેવા માટે પહોંચ્યા છે. આ મુલાકાત તે સમયે થઈ જ્યારે રાષ્ટ્રપ્રમુખ ટ્રમ્પ G-7 ની મીટિંગમાં ભાગ લેવા માટે મીટિંગ હોલમાં બેઠા હતા. બરાબર તે જ સમયે વડાપ્રધાન નરેન્દ્ર મોદી ત્યાં પહોંચ્યા હતા અને આ દરમિયાન બંને નેતાઓ વચ્ચે હેન્ડશેક થયું હતું. બંને ટોચના નેતાઓ વચ્ચે લગભગ ૫૦ સેકન્ડ સુધી વાતચીત ચાલી હતી.
સમિટની સત્તાવાર કાર્યવાહી શરૂ થાય તે પહેલાં બંને નેતાઓએ હસતા મુખે એકબીજાનું અભિવાદન કર્યું હતું. વિશ્વભરના નેતાઓ ફ્રાન્સના રાષ્ટ્રપ્રમુખ ઇમેન્યુઅલ મેક્રોનની યજમાનીમાં યોજાઈ રહેલી આ સમિટ માટે એકઠા થયા છે, જ્યાં મહત્વના વૈશ્વિક મુદ્દાઓ પર ચર્ચા શરૂ થાય તે પહેલાં મેક્રોને સમિટ સ્થળ પર પીએમ મોદીનું સ્વાગત કર્યું હતું.
બંને દેશો વચ્ચે વિસ્તૃત ચર્ચા થઈ શકે
ઉલ્લેખનીય છે કે, હોર્મુઝમાં અમેરિકી નેવી દ્વારા કરવામાં આવેલા હુમલામાં ત્રણ ભારતીયોના મોત થયા બાદ ભારતે ખૂબ જ કડકાઈથી પ્રતિક્રિયા આપી હતી. જોકે, અમેરિકા તરફથી આ અંગે કોઈ ખાસ સ્પષ્ટતા કરવામાં આવી નહોતી અને વિદેશ મંત્રી માર્કો રુબિયોએ ઊલટું એવું નિવેદન આપ્યું હતું કે, હોર્મુઝમાંથી પસાર થતા દેશોએ અમેરિકી નેવીના આદેશોનું પાલન કરવું જોઈએ. આ ઘટના બાદ બંને દેશોના સંબંધોમાં કડવાશ આવી ગઈ હતી અને ભારતના વિદેશ મંત્રી જયશંકરે અમેરિકી વિદેશ મંત્રી રુબિયો સમક્ષ ભારતનો સખત વિરોધ પણ નોંધાવ્યો હતો.
બંને દેશો વચ્ચે સર્જાયેલા આ વિવાદ અને તણાવ પછી બંને રાષ્ટ્રાધ્યક્ષો વચ્ચે G-7 ના મંચ પર આ પહેલી મુલાકાત થઈ છે. આ ટૂંકી મુલાકાત બાદ હવે ટ્રમ્પ અને પીએમ મોદી વચ્ચે આગામી ઔપચારિક મુલાકાત યોજાશે, જેમાં બંને દેશો વચ્ચે વિસ્તૃત ચર્ચા થઈ શકે છે.
