Last Updated on by Sampurna Samachar
બાઇકચાલક યુવકનુ ઘટનાસ્થળે જ મોત
સમગ્ર પંથકમાં શોકનું મોજુ ફરી વળ્યું
(સંપૂર્ણ સમાચાર સેવા)
ભાવનગર જિલ્લાના તણસા ગામ પાસે ગમખ્વાર અકસ્માત સર્જાયો હતો. પૂરપાટ ઝડપે આવી રહેલા એક ટ્રેલરે બાઇકચાલકને જોરદાર ટક્કર મારી હતી. આ અકસ્માત એટલો ભીષણ હતો કે, બાઇકચાલક યુવકનું ઘટના સ્થળે જ કમકમાટીભર્યું મોત નીપજ્યું હતું, જેના કારણે સમગ્ર પંથકમાં શોકનું મોજુ ફરી વળ્યું છે.
પ્રાપ્ત વિગતો અનુસાર, મૃતક યુવક તળાજા તાલુકાના ઊંચડી ગામ ખાતે રહેતો હતો અને પોતાના બાઇક પર જઈ રહ્યો હતો. તે દરમિયાન તણસા ગામ પાસેથી પસાર થતી વેળાએ પાછળથી કે સામેથી પૂરપાટ ઝડપે આવી રહેલા એક ટ્રેલરના ચાલકે તેને પોતાની અડફેટે લીધો હતો. ટ્રેલરની ટક્કરથી બાઇકચાલક યુવક રોડ પર પટકાયો હતો અને તેને ગંભીર ઇજાઓ થવાથી તેનું સ્થળ પર જ પ્રાણપંખેરું ઉડી ગયું હતું.
ટ્રેલર ચાલક સામે કાયદેસરની કાર્યવાહી હાથ ધરાઇ
અકસ્માતની આ ઘટનાની જાણ થતાં જ સ્થાનિક લોકો એકઠા થઈ ગયા હતા અને તંત્રને જાણ કરી હતી. માહિતી મળતાની સાથે જ હાઇવે ટ્રાફિક પોલીસની ટીમ તાત્કાલિક ઘટના સ્થળે દોડી આવી હતી. પોલીસે મૃતકના મૃતદેહને પોસ્ટ મોર્ટમ અર્થે ખસેડવાની તજવીજ હાથ ધરી હતી. અકસ્માતના કારણે હાઇવે પર સર્જાયેલા ટ્રાફિકજામને દૂર કરીને પોલીસે રસ્તો ક્લિયર કરાવ્યો હતો અને ટ્રેલર ચાલક સામે કાયદેસરની કાર્યવાહી કરી વધુ તપાસ શરૂ કરી છે.
