Last Updated on by Sampurna Samachar
પહેલગામ હુમલા વિશે નિષ્પક્ષ તપાસની કરી વાત
૩ દિવસમાં ૫૩૭ પાકિસ્તાની નાગરિકો પાકિસ્તાન પરત ફર્યા
(સંપૂર્ણ સમાચાર સેવા)
જમ્મુ અને કાશ્મીરના પહેલગામમાં થયેલા આતંકવાદી હુમલા અને ૨૬ લોકોની ક્રૂર હત્યા બાદ ભારત અને પાકિસ્તાન વચ્ચે તણાવ ચરમસીમાએ પહોંચી ગયો છે. એવું માનવામાં આવે છે કે ટૂંક સમયમાં બંને દેશો વચ્ચે લશ્કરી સંઘર્ષ જોવા મળી શકે છે. આવા સમયે, આ તણાવ વચ્ચે, ચીનની પ્રતિક્રિયા પણ સામે આવી છે. ચીનના વિદેશ મંત્રી વાંગ યીએ પાકિસ્તાનના વિદેશ મંત્રી ઇશાક ડાર સાથે વાત કરી છે.
ચીનના અહેવાલ મુજબ તેમના સમકક્ષ ઈશાક ડાર સાથે ટેલિફોનિક વાતચીત દરમિયાન, ચીનના વિદેશ પ્રધાન વાંગ યીએ જમ્મુ અને કાશ્મીરના પહેલગામમાં થયેલા આતંકવાદી હુમલાની નિષ્પક્ષ તપાસ માટે સમર્થન વ્યક્ત કર્યું છે. ચીને આશા વ્યક્ત કરી છે કે ભારત અને પાકિસ્તાન બંને સંયમ રાખશે અને તણાવ ઘટાડવા માટે સાથે મળીને કામ કરશે.
પાકિસ્તાન વિરુદ્ધ ઘણા પગલાં લીધાં
પાકિસ્તાનના વિદેશ મંત્રી ઇશાક ડારે ચીનના વિદેશ મંત્રીને આતંકવાદી હુમલા બાદ ભારત અને પાકિસ્તાન વચ્ચેના તણાવ અંગેના તાજેતરના વિકાસ વિશે માહિતી આપી છે. ઉલ્લેખનીય છે કે પહેલગામમાં થયેલા આતંકવાદી હુમલા બાદ, ભારત સરકારે પાકિસ્તાન વિરુદ્ધ ઘણા પગલાં લીધાં છે, જેમાં સિંધુ જળ સંધિને સ્થગિત કરવી અને તમામ પાકિસ્તાની વિઝા પર પ્રતિબંધ મૂકવો વગેરેનો સમાવેશ થાય છે. વિઝા પ્રતિબંધ પછી, છેલ્લા ૩ દિવસમાં ૫૩૭ પાકિસ્તાની નાગરિકો અટારી સરહદ દ્વારા તેમના દેશ પરત ફર્યા છે.
