Last Updated on by Sampurna Samachar
ભીડભાડવાળા જાહેર સ્થળોએ સુરક્ષા વધારી દેવાઇ
ઢાકાથી ચટગાંવ સુધી બોંબનો ખતરો તોળાઇ રહ્યો છે
(સંપૂર્ણ સમાચાર સેવા)
બાંગ્લાદેશમાં સંભવિત બોમ્બ હુમલાની આશંકાને પગલે સમગ્ર દેશમાં સુરક્ષા વ્યવસ્થા કડક કરવામાં આવી છે. છેલ્લા કેટલાક દિવસોમાં ઢાકાથી ચટગાંવ સુધી વિવિધ વિસ્તારોમાંથી કુલ ૧૦૩ શંકાસ્પદ બોમ્બ અને વિસ્ફોટક જેવી વસ્તુઓ મળી આવ્યાના અહેવાલો બાદ પોલીસ અને અન્ય સુરક્ષા એજન્સીઓને હાઇ એલર્ટ પર રાખવામાં આવી છે.
ગુપ્તચર એજન્સીઓ તરફથી મળેલા ઇનપુટ્સને આધારે પોલીસ કર્મચારીઓ, પોલીસ સ્થાપનો અને સરકારી સંસ્થાઓને નિશાન બનાવવાનો પ્રયાસ થઈ શકે તેવી આશંકા વ્યક્ત કરવામાં આવી છે. પોલીસ મુખ્યાલયે દેશભરની તમામ જિલ્લા પોલીસ, મેટ્રોપોલિટન પોલીસ અને અન્ય સુરક્ષા દળોને વધારાની સતર્કતા રાખવા સૂચના આપી છે.
સરકારી વાહનો પર વિશેષ નજર રાખવા સૂચના
સરકારી કચેરીઓ, પોલીસ મથકો, મેટ્રો સ્ટેશનો, મુખ્ય માર્ગો અને ભીડભાડવાળા જાહેર સ્થળોએ સુરક્ષા વધારી દેવામાં આવી છે. ઉપરાંત નિયમિત પેટ્રોલિંગની સાથે શંકાસ્પદ વાહનો અને વ્યક્તિઓની સઘન તપાસ પણ શરૂ કરવામાં આવી છે.
તાજેતરના દિવસોમાં ઢાકાના આશુલિયા વિસ્તારમાં રિમોટ કંટ્રોલથી સંચાલિત હોવાનું માનવામાં આવતું એક શંકાસ્પદ બોમ્બ મળી આવ્યું હતું. ત્યારબાદ ૨૪ જુલાઈએ મોતીઝીલ મેટ્રો સ્ટેશનની નીચે ટાઈમર સાથેનો પાઇપ બોમ્બ મળી આવતા સુરક્ષા એજન્સીઓ વધુ સતર્ક બની ગઈ હતી. જોકે ફાર્મગેટ અને મીરપુર-૧૦ મેટ્રો સ્ટેશન પર મળેલી કેટલીક શંકાસ્પદ વસ્તુઓની તપાસ બાદ તે વિસ્ફોટક ન હોવાનું સ્પષ્ટ થયું હતું.
આ સમગ્ર મામલાની તપાસ સંબંધિત સુરક્ષા અને ગુપ્તચર એજન્સીઓ દ્વારા કરવામાં આવી રહી છે. આ વિસ્ફોટક સામગ્રી કોણે મૂકી, તેનો હેતુ શું હતો અને તેની પાછળ કોઈ સંગઠિત ગેંગ અથવા આતંકી તત્વોનો હાથ છે કે નહીં તે અંગે તપાસ ચાલી રહી છે. અત્યાર સુધી અધિકારીઓએ કોઈ ચોક્કસ સંગઠનનું નામ જાહેર કર્યું નથી.
સુરક્ષા વ્યવસ્થાના ભાગરૂપે પોલીસના વાહનો, બસો, જીપો અને અન્ય સરકારી વાહનો પર પણ વિશેષ નજર રાખવાનો આદેશ આપવામાં આવ્યો છે. વાહનો ફરજ દરમિયાન જ નહીં પરંતુ પાર્કિંગ દરમિયાન પણ સુરક્ષિત રહે તેની ખાતરી કરવા તમામ એકમોને સૂચના આપવામાં આવી છે. સાથે જ કોઈપણ શંકાસ્પદ વસ્તુ અથવા પ્રવૃત્તિ અંગે તરત જ કાર્યવાહી કરવા માટે ખાસ માર્ગદર્શિકા જારી કરવામાં આવી છે.
