ટ્રમ્પે બંને અંતરિક્ષયાત્રીઓને ધરતી પર પાછા લાવવાનુ કામ એલોન મસ્કને સોંપ્યુ
(સંપૂર્ણ સમાચાર સેવા)
ઈન્ટરનેશનલ સ્પેસ સ્ટેશન (ISS) પર સાત મહિના વિતાવનાર અમેરિકન અંતરિક્ષયાત્રી સુનિતા વિલિયમ્સને હવે ચાલવા માટે પણ સંઘર્ષ કરવો પડી રહ્યો છે. તાજેતરમાં, તેમણે વિદ્યાર્થીઓ સાથેની વાતચીતમાં કહ્યું હતું કે, ‘ચાલવાની અનુભૂતિ કેવી હોય છે, એ પણ હું હવે ભૂલી ગઈ છું.’
ગુરુત્વાકર્ષણના અભાવે અંતરિક્ષયાત્રીઓ પૃથ્વી પર જે રીતે ગતિમાન રહેતા હોય છે એ રીતે અંતરિક્ષમાં રહી શકતા નથી. જેને લીધે શરીરના વિવિધ સ્નાયુઓ નબળા પડી જાય છે અને હાડકાં પણ પોલા થઈ જાય છે. સ્પેસ સ્ટેશન પર અંતરિક્ષયાત્રીઓ કસરત કરતા હોવા છતાં તેમના શરીરે પૂરતું બળ લગાવવું ન પડતું હોવાથી લાંબા ગાળે શરીરને નુકસાન થતું હોય છે.
ઈન્ટરનેશનલ સ્પેસ સ્ટેશન પર સુનિતા સાથે એમના સાથી અંતરિક્ષયાત્રી બૂચ વિલ્મોર પણ ફસાયેલા છે. એક મહિનામાં પૂરું થનારું તેમનું મિશન આજકાલ કરતાં સાત મહિના લંબાઈ ગયું છે. સ્ટારલાઈનર અંતરિક્ષયાનમાં થયેલી ગરબડના કારણે તેમણે સ્પેસ સ્ટેશનમાં રોકાઈ જવાની ફરજ પડી હતી. બંનેને પૃથ્વી પર પાછા લાવવાના પ્રયાસ થઈ રહ્યા છે, પણ એમાં સફળતા નથી મળી રહી.
મહિનાઓથી સતત વજનહીન સ્થિતિ રહેવાથી બંને અંતરિક્ષયાત્રીઓના શરીર પર પ્રતિકૂળ અસર થઈ રહી છે, જેને લીધે અંતરિક્ષયાત્રા બાબતે ગંભીર પ્રશ્નો ચર્ચાવા લાગ્યા છે. અંતરિક્ષયાત્રીઓને ચંદ્ર અને મંગળ પર મોકલવાની ગણતરીઓ માંડી રહેલી અંતરિક્ષ એજન્સીઓએ તેમના મહત્ત્વાકાંક્ષી પ્રોજેક્ટસ વિશે ફરી વિચાર કરવો પડે એવી સ્થિતિ હાલ સુનિતા અને બૂચ વિલ્મોરની થઈ છે.
લોકો પૂછી રહ્યા છે કે ‘પ્રમાણમાં નજીકના’ સ્પેશ સ્ટેશન પર ફસાઈ ગયેલા અંતરિક્ષયાત્રીઓને પૃથ્વી પર પાછા લાવવામાં આટલો વિલંબ થઈ રહ્યો હોય તો ભવિષ્યમાં અંતરિક્ષયાત્રીઓને દૂરના અંતરિક્ષમાં મોકલવાનું જોખમ કઈ રીતે લઈ શકાય?
સુનિતા વિલિયમ્સ અને એમના સાથી જો બાઈડેનના રાજમાં અંતરિક્ષમાં ફસાઈ ગયા હોવાથી વર્તમાન પ્રમુખ ડોનાલ્ડ ટ્રમ્પે આ મુદ્દે પણ રાજકીય દાવ ખેલી લીધો છે. એમ કહીને કે, ‘બાઈડેને બંને અંતરિક્ષયાત્રીઓને તરછોડી દીધા છે.’ તરછોડી દેવાયેલા અમેરિકન હીરોઝને ધરતી પર પાછા લાવવાનું ભગીરથ કામ તેમણે ઈલોન મસ્કને સોંપ્યું છે. મસ્કએ આ કામ માથે લઈ લેતા કહ્યું છે કે, ‘અમે સ્પેસએક્સ મિશન યોજીને અંતરિક્ષયાત્રીઓને ઘરે પરત લઈ આવીશું.’