Last Updated on by Sampurna Samachar
હરિયાણા, ચંદીગઢ અને પંજાબમાં ભારે પવન સાથે વરસાદની આગાહી
રાજસ્થાનમાં પણ ચોમાસું સક્રિય રહેશે
(સંપૂર્ણ સમાચાર સેવા)
ઉત્તર ભારતના મેદાની વિસ્તારોમાં હવામાનમાં મોટો ફેરફાર જોવા મળી રહ્યો છે. હવામાન વિભાગના જણાવ્યા મુજબ દિલ્હીમાં ૪ જુલાઈ સુધી હળવાથી મધ્યમ વરસાદ પડી શકે છે, જ્યારે કેટલાક વિસ્તારોમાં ભારે વરસાદની પણ શક્યતા છે. ૧ થી ૩ જુલાઈ દરમિયાન હરિયાણા, ચંદીગઢ અને પંજાબના કેટલાક વિસ્તારોમાં ભારે વરસાદ સાથે ૪૦થી ૫૦ કિમી પ્રતિ કલાકની ઝડપે પવન ફૂંકાઈ શકે છે.
ઉત્તરાખંડમાં તેમજ હિમાચલ પ્રદેશમાં ૨ અને ૩ જુલાઈ દરમિયાન કેટલાક વિસ્તારોમાં ભારે વરસાદની શક્યતા છે. પશ્ચિમ અને પૂર્વ ઉત્તર પ્રદેશમાં પણ ૩૦ જૂનથી ૫ જુલાઈ સુધી વરસાદ, ગાજવીજ અને વીજળી પડવાની શક્યતા છે.
મોટાભાગના રાજ્યોમાં ભારે વરસાદની શક્યતા
રાજસ્થાનમાં પણ ચોમાસું સક્રિય રહેશે. પૂર્વ રાજસ્થાનમાં ૫૦થી ૬૦ કિમી પ્રતિ કલાકની ઝડપે તેજ પવન સાથે આંધીની શક્યતા છે, જ્યારે પશ્ચિમ રાજસ્થાનમાં ૨થી ૫ જુલાઈ દરમિયાન ધૂળભરી આંધીઓ ફૂંકાઈ શકે છે.
મધ્ય પ્રદેશ, છત્તીસગઢ અને વિદર્ભ વિસ્તારમાં ચોમાસું સંપૂર્ણ રીતે સક્રિય રહેશે. ૧થી ૫ જુલાઈ દરમિયાન આ વિસ્તારોમાં ભારે વરસાદની શક્યતા છે. મધ્ય પ્રદેશમાં ૨થી ૪ જુલાઈ અને વિદર્ભમાં ૩થી ૪ જુલાઈ દરમિયાન કેટલાક વિસ્તારોમાં અતિભારે વરસાદ પડી શકે છે. સાથે જ ગાજવીજ, વીજળી પડવી અને ૪૦થી ૫૦ કિમી પ્રતિ કલાકની ઝડપે પવન ફૂંકાવાની પણ સંભાવના છે.
ઝારખંડ, ઓડિશા અને પશ્ચિમ બંગાળના કેટલાક વિસ્તારોમાં ભારે વરસાદની આગાહી કરવામાં આવી છે. બિહારમાં પણ ૨ થી ૫ જુલાઈ દરમિયાન વરસાદ સાથે તેજ પવન ફૂંકાઈ શકે છે. ગાજવીજ અને વીજળી પડવાની સંભાવનાને ધ્યાનમાં રાખીને લોકોને સાવચેત રહેવાની સલાહ આપવામાં આવી છે.
અરુણાચલ પ્રદેશ, આસામ, મેઘાલય, નાગાલેન્ડ, મણિપુર, મિઝોરમ અને ત્રિપુરામાં પણ ચોમાસું સક્રિય રહેશે. ૨ જુલાઈ સુધી મોટાભાગના રાજ્યોમાં ભારે વરસાદની શક્યતા છે. અરુણાચલ પ્રદેશ, આસામ અને મેઘાલયના કેટલાક વિસ્તારોમાં ભારેથી અતિભારે વરસાદ પડી શકે છે. સાથે જ ગાજવીજ, વીજળી પડવી અને તેજ પવનની અસર પણ જોવા મળી શકે છે.
