Last Updated on by Sampurna Samachar
આવકવેરા વિભાગે શેલ કંપનીઓ દ્વારા કર બચાવવાનો આરોપ લગાવ્યો
ઇન્ડિગોએ આવકવેરા દંડને પાયાવિહોણો ગણાવ્યો
(સંપૂર્ણ સમાચાર સેવા)
આવકવેરા વિભાગ દ્વારા ઇન્ડિગો અને તેની સાથે સંકળાયેલી ૧૫ ઇન્ટરનેશનલ વિમાન લેસર્સને રૂ. ૧૫૦૦ કરોડની કર નોટીસ ફટકારવામાં આવી છે. વિભાગ દ્વારા તેમની આયર્લેન્ડમાં બનેલી બનાવટી કંપની (શેલ કંપનીઓ) દ્વારા કર બચાવવાનો આરોપ લગાવ્યો છે. આ નોટીસ ઓક્ટોબર ૨૦૨૪ થી માર્ચ ૨૦૨૫ ની વચ્ચે મોકલવામાં આવી હતી. કરમાં હેરફેરનો મામલો ૨૦૨૧-૨૨ અને ૨૦૨૨-૨૩ના નાણાંકીય વર્ષો સાથે સંકળાયેલો છે.
હકીકતમાં, કરવેરા અધિકારીઓ કહે છે કે એરલાઇન્સે વિમાન ભાડે લેવા માટે આયર્લેન્ડમાં SPV \ SPC (સ્પેશિયલ પર્પઝ વ્હીકલ) નામની શેલ કંપનીઓ બનાવી હતી, જેનો વાસ્તવમાં કોઈ વ્યવસાય, ઓફિસ કે કર્મચારીઓ નથી. તેમનો એકમાત્ર હેતુ આયર્લેન્ડ-ભારત કર સંધિ (DTAA) નો લાભ લઈને ભારતમાં કર ચૂકવવાનું ટાળવાનો હતો.
આ મામલે કાનૂની આશરો લેશે
જોકે, કંપનીઓએ તેને ખોટું ગણાવ્યું છે અને કહ્યું છે કે તેઓ તેને કોર્ટમાં પડકારશે. તે જ સમયે, આઇરિશ સરકારે પણ તેના ભાડે આપનારાઓનો બચાવ કર્યો છે અને કહ્યું છે કે તેમની કંપનીઓને શેલ કહેવાના આરોપો ખોટા છે. તે કંપનીઓ ખરેખર અસ્તિત્વ ધરાવે છે. ઇન્ડિગો (INDIGO) નો શેર એપ્રિલે ૨.૩૮%ના વધારા સાથે રૂ. ૫,૪૯૩.૫૦ પર ટ્રેડ થઈ રહ્યો હતો છે. છેલ્લા ૫ ટ્રેડિંગ દિવસોમાં આ શેરે ૬.૬૭% નું વળતર આપ્યું છે. છેલ્લા ૧ વર્ષમાં શેરમાં ૪૭.૪૦% નો વધારો થયો છે.
માર્ચમાં ઇન્ડિગોને રૂ.૯૪૪.૨૦ કરોડની ટેક્સ નોટિસ મળી હતી.આ પહેલા ૩૦ માર્ચે આવકવેરા વિભાગે ઇન્ડિગોની મૂળ કંપની ઇન્ટરગ્લોબ એવિએશનને ૯૪૪.૨૦ કરોડ રૂપિયાનો દંડનો હુકમ કર્યો હતો. કંપનીએ એક્સચેન્જ ફાઇલિંગમાં જણાવ્યું હતું કે આ દંડ આકારણી વર્ષ ૨૦૨૧-૨૨ માટે આવકવેરા કાયદાની કલમ ૨૭૦છ હેઠળ લાદવામાં આવ્યો છે.
આ સાથે, ચેન્નઈના સંયુક્ત આવકવેરા કમિશનરે કંપની પર ૨.૮૪ કરોડ રૂપિયાનો દંડ પણ ફટકાર્યો હતો. ઇન્ડિગોએ આવકવેરા દંડને પાયાવિહોણો ગણાવ્યો હતો. કંપનીએ જણાવ્યું હતું કે કલમ ૧૪૩(૩) હેઠળના આકારણી આદેશ સામે તેની અપીલ પેન્ડિંગ હતી પરંતુ કર અધિકારીઓએ તેને ફગાવી દીધી હતી અને દંડ લાદ્યો હતો.
કંપનીએ વધુમાં કહ્યું કે તે આ મામલે કાનૂની આશરો લેશે અને આ આદેશને પડકારશે. દંડની આવક, કામગીરી અથવા વ્યવસાય પર કોઈ ખાસ અસર થતી નથી. આ પહેલા જીએસટી અને કસ્ટમ વિભાગે પણ દંડ ફટકાર્યો છે. ૫ ફેબ્રુઆરીના રોજ, ઇન્ડિગોને GST વિભાગ તરફથી ૧૧૬ કરોડ રૂપિયાની ટેક્સ ડિમાન્ડ નોટિસ મળી હતી.
તે સમયે, દિલ્હી અને ચેન્નઈના અધિકારીઓ દ્વારા કંપની પર ઇનપુટ ટેક્સ ક્રેડિટ સંબંધિત અનિયમિતતાઓનો આરોપ મૂકવામાં આવ્યો હતો. ૧૫ જાન્યુઆરીના રોજ, કસ્ટમ્સ વિભાગે જેટ ઇંધણ પર વધારાની ડ્યુટી વસૂલવા બદલ ૨૫ લાખ રૂપિયાનો દંડ ફટકાર્યો હતો. ૬ જાન્યુઆરીના રોજ, વિમાનના ભાગોની આયાત પર ૨.૧૭ કરોડ રૂપિયાનો દંડ ફટકારવામાં આવ્યો હતો.
