Last Updated on by Sampurna Samachar
વડાપ્રધાન મોદી અને રાષ્ટ્રપતિ ટ્રમ્પની મુલાકાતમાં અનેક વાતો
(સંપૂર્ણ સમાચાર સેવા)
વડાપ્રધાન નરેન્દ્ર મોદી અમેરિકાના રાષ્ટ્રપતિ ડોનાલ્ડ ટ્રમ્પ સાથે મુલાકાત કરીને ભારત પરત ફર્યા છે. આ દરમિયાન તેમણે ક્રૂડના સોદાનો મુદ્દો જોરશોરથી ઉઠાવ્યો છે. ટ્રમ્પે PM મોદી સાથે પ્રેસ કોન્ફરન્સમાં કહ્યું કે, અમારી પાસે અન્ય દેશોની તુલનાએ વધુ ક્રૂડ અને ગેસ છે. ભારતને બંનેની જરૂરીયાત છે અને તે અમારી પાસે છે. ટ્રમ્પે વેપારી નીતિ અંગે કહ્યું કે, ‘અમે ભારત સાથે કામ કરવાની યોજના બનાવી છે. અમે ભવિષ્યમાં ભારત સાથે મોટી સમજૂતી કરારની જાહેરાત કરવાના છીએ.’
PM મોદીએ ટ્રમ્પના નિવેદન પર પ્રતિક્રિયા આપતી વખતે કહ્યું કે, ‘રાષ્ટ્રપતિ ટ્રમ્પ અમેરિકાના રાષ્ટ્રીય હિતને હંમેશા સર્વોચ્ચ માને છે અને તેમની જેમ હું પણ ભારતના રાષ્ટ્રીય હિતોને સર્વોચ્ચ રાખું છું. ત્યારબાદ ટ્રમ્પે કહ્યું કે, ‘અમારી પાસે વાત કરવા માટે કેટલીક મહત્ત્વની બાબતો છે.
ભારત અમેરિકા પાસેથી બહોળા પ્રમાણમાં ક્રૂડ ઓઇલ અને ગેસ ખરીદવાનું છે. વિશ્વના કોઈપણ દેશની તુલનાએ અમારી પાસે સૌથી વધુ ક્રૂડ અને ગેસ છે. ભારતને તેની જરૂર છે અને અમારી પાસે તે છે. અમારા બંને વચ્ચે ઉર્જા પર સમજૂતી થઈ છે, જેનાથી આપણે ભારતમાં તેલ અને ગેસના અગ્રણી સપ્લાયર બનીશું..
ભારત દર વર્ષે અન્ય દેશો પાસેથી કેટલી રકમનું પેટ્રોલ-ડિઝલ ખરીદે છે તેની વાત કરીએ તો આ આંકડો ૧૩૨ અબજ ડૉલર એટલે કે ૧૧ લાખ કરોડ છે. ભારત ચીન અને અમેરિકા બાદ ક્રૂડ ઓઇલ ખરીદનાર વિશ્વનો ત્રીજો મોટો દેશ છે. જોકે ભારત ૮૦ ટકા ક્રૂડ અન્ય દેશોમાંથી મંગાવે છે અને તે માટે ૨૦૨૪માં ૧૧ લાખ કરોડ રૂપિયાનો ખર્ચ કરવો પડ્યો છે. તેથી જ ભારતની ક્રૂડ શોપિંગ પર ટ્રમ્પની નજર છે. અમેરિકા ઇચ્છે છે કે, ભારત પોતાની જરૂરીયાતમાંથી વધુમાં વધુ ક્રૂડ તેની પાસેથી ખરીદે. ક્રૂડ ઓઇલમાં ભારતની ખરીદ ક્ષમતા એટલી વિશાળ છે કે, તે કોઈપણ દેશને ડૉલરથી માલામાલ કરી શકે છે.
