Last Updated on by Sampurna Samachar
યુરોપમાં રેકોર્ડબ્રેક ગરમીથી લોકો ત્રાહિમામ
૧૦૦૦ થી વધુ લોકોએ પોતાના જીવ ગુમાવ્યા
(સંપૂર્ણ સમાચાર સેવા)
યુરોપમાં આ વર્ષે અનુભવાતી રેકોર્ડબ્રેક ગરમીએ ફ્રાન્સમાં વિનાશક સ્વરૂપ ધારણ કર્યું હોવાનુ સામે આવ્યુ છે. ભીષણ હીટવેવના કારણે દેશભરમાં ૧૦૦૦થી વધુ લોકોએ પોતાના જીવ ગુમાવ્યા છે, જેનાથી સમગ્ર ફ્રાન્સમાં ગમગીની અને ભયનો માહોલ છે. આ મૃત્યુ પામેલા લોકોમાં ૮૫ ટકા વ્યક્તિઓ ૬૫ વર્ષ કે તેથી વધુ ઉંમરના છે, જે દર્શાવે છે કે વૃદ્ધો આ આત્યંતિક તાપમાન સામે સૌથી વધુ સંવેદનશીલ છે.
પરિસ્થિતિ એટલી હદે ગંભીર બની ગઈ છે કે દેશના અંતિમ સંસ્કાર ગૃહો મૃતદેહોથી ઉભરાઈ રહ્યા છે. નેશનલ ફ્યુનરલ ફેડરેશનના વડા એલિઝાબેથ શ્રિરે જણાવ્યું હતું કે, સામાન્ય રીતે ઉનાળામાં ફ્યુનરલ હોમ્સમાં ૩૦ થી ૪૫ ટકા ભરાવો રહેતો હોય છે, જે અત્યારે વધીને ૬૬ ટકાને પાર કરી ગયો છે. ખાસ કરીને પેરિસમાં સ્થિતિ વધુ વિકટ છે, જ્યાં ઘણા ફ્યુનરલ હોમ્સ સંપૂર્ણપણે ભરાઈ ગયા છે. હવે લોકોએ તેમના સ્વજનોના અંતિમ સંસ્કાર માટે પેરિસ શહેરની બહાર અથવા દૂરના વિસ્તારોમાં જવું પડી રહ્યું છે.
આટલું ઊંચું તાપમાન સામાન્ય માનવ જીવન માટે અસહ્ય
કબ્રસ્તાનમાં દફનવિધિ માટે પણ જગ્યાનો અભાવ સર્જાયો છે. કબ્રસ્તાનના કામદારો મૃતકોની વધતી સંખ્યા સામે ઝડપથી કબરો ખોદવામાં અસમર્થ સાબિત થઈ રહ્યા છે. નિષ્ણાતો હવે ‘ડોમિનો ઇફેક્ટ‘ની ચેતવણી આપી રહ્યા છે, જ્યાં એક ઘટનાની સાંકળ બીજી ગંભીર સમસ્યાઓને નોતરી રહી છે. ફ્રાન્સના વડા પ્રધાન સેબેસ્ટિયન લેકોર્નુએ આ ગંભીર કટોકટીને પહોંચી વળવા માટે તાત્કાલિક ઉચ્ચ સ્તરીય બેઠક યોજી છે. દેશભરની શાળાઓ અને પર્યટન સ્થળો બંધ કરી દેવામાં આવ્યા છે, કારણ કે સામાન્ય જનજીવન સંપૂર્ણપણે ખોરવાઈ ગયું છે.
વૈજ્ઞાનિકો આ અસહ્ય ગરમીને સ્પષ્ટપણે આબોહવા પરિવર્તન સાથે જોડી રહ્યા છે. યુરોપના દેશો જે ઠંડી આબોહવા માટે જાણીતા હતા, ત્યાં આટલું ઊંચું તાપમાન સામાન્ય માનવ જીવન માટે અસહ્ય બની ગયું છે. આ ઘટના માત્ર ફ્રાન્સ માટે જ નહીં, પરંતુ સમગ્ર વિશ્વ માટે આબોહવા પરિવર્તનના ખતરાને સમજવા માટે એક મોટી ચેતવણી સમાન છે. આગામી દિવસોમાં જો તાપમાનમાં ઘટાડો નહીં થાય, તો પરિસ્થિતિ વધુ ગંભીર બની શકે છે. ફ્રાન્સની સરકાર હાલમાં આ આપત્તિને નિયંત્રિત કરવા માટે તમામ સ્તરે પ્રયત્નો કરી રહી છે, પરંતુ મૃત્યુઆંક અને વ્યવસ્થાપનની મર્યાદાઓ સતત ચિંતા વધારી રહી છે.
