Last Updated on by Sampurna Samachar
કુવૈત-પાકિસ્તાન વચ્ચે થયો હતો કરાર
લશ્કરી અને સુરક્ષા સંબંધો વધુ મજબૂત બનશે
(સંપૂર્ણ સમાચાર સેવા)
કુવૈતે લગભગ ત્રણ વર્ષ બાદ પાકિસ્તાન સાથે થયેલા સંરક્ષણ સહયોગ કરારને સત્તાવાર મંજૂરી આપી છે. વર્ષ ૨૦૨૩માં બંને દેશો વચ્ચે હસ્તાક્ષર કરાયેલા આ કરારને હવે કુવૈતી શાહી હુકમનામા બાદ કાનૂની માન્યતા મળી છે. આ ર્નિણયથી બંને દેશો વચ્ચેના લશ્કરી અને સુરક્ષા સંબંધોને વધુ મજબૂત બનાવવાની દિશામાં મહત્વપૂર્ણ પગલું માનવામાં આવી રહ્યું છે.
૧૧ જૂન, ૨૦૨૩ના રોજ થયેલા આ કરારને વિવિધ કાનૂની પ્રક્રિયાઓ પૂર્ણ થયા બાદ હવે અમલમાં મૂકવામાં આવ્યો છે. કરારનો મુખ્ય હેતુ કુવૈત અને પાકિસ્તાનની સશસ્ત્ર દળો વચ્ચે તાલીમ, સંરક્ષણ શિક્ષણ, તકનીકી સહયોગ અને વ્યૂહાત્મક સંકલનને વધુ ગાઢ બનાવવાનો છે.
પાકિસ્તાનને ગલ્ફ ક્ષેત્રમાં વ્યૂહાત્મક હાજરી મજબૂત કરવાની તક મળશે
કુવૈતી સરકાર દ્વારા જાહેર કરાયેલા શાહી હુકમનામા મુજબ, આ કરારમાં કુલ ૧૨ મુદ્દાઓનો સમાવેશ કરવામાં આવ્યો છે. તેમાં લશ્કરી તાલીમ, સંરક્ષણ સંસ્થાઓ વચ્ચે સહયોગ, સંયુક્ત અભ્યાસ, અનુભવોની આપ-લે, તકનીકી સહયોગ અને ગુપ્તચર માહિતીના આદાન-પ્રદાન જેવી બાબતોનો સમાવેશ થાય છે. સંબંધિત મંત્રાલયો અને સુરક્ષા એજન્સીઓને કરારના અમલ માટે જરૂરી કાર્યવાહી શરૂ કરવાની સૂચના આપવામાં આવી છે.
કરાર પર હસ્તાક્ષર થયા બાદ લગભગ ત્રણ વર્ષ પછી તેની સત્તાવાર મંજૂરી મળવી બંને દેશો માટે મહત્વપૂર્ણ માનવામાં આવી રહી છે. ગલ્ફ ક્ષેત્રમાં બદલાતા ભૌગોલિક અને સુરક્ષા સમીકરણોને ધ્યાનમાં રાખીને કુવૈત પોતાની સંરક્ષણ ભાગીદારીને વધુ મજબૂત બનાવવાનો પ્રયાસ કરી રહ્યું છે. બીજી તરફ, પાકિસ્તાન લાંબા સમયથી ગલ્ફ દેશો સાથે લશ્કરી તાલીમ અને સુરક્ષા સહયોગમાં સક્રિય રહ્યું છે.
નિષ્ણાતોના મતે, આ કરારથી પાકિસ્તાનને ગલ્ફ ક્ષેત્રમાં પોતાની વ્યૂહાત્મક હાજરી વધુ મજબૂત કરવાની તક મળશે. સાથે જ બંને દેશો વચ્ચે સંયુક્ત લશ્કરી તાલીમ, અધિકારીઓની આપ-લે અને સંરક્ષણ ક્ષેત્રમાં ટેક્નિકલ સહયોગને નવી દિશા મળશે. જોકે, મોટા પાયે સંયુક્ત લશ્કરી અભ્યાસ, સંરક્ષણ ખરીદી અથવા અન્ય ચોક્કસ કાર્યક્રમોની વિગતો હજુ જાહેર કરવામાં આવી નથી.
ઉલ્લેખનીય છે કે, તાજેતરના સમયમાં ગલ્ફ ક્ષેત્રમાં સુરક્ષા પડકારો અને પ્રાદેશિક પરિસ્થિતિમાં થતા ફેરફારોને ધ્યાનમાં રાખીને અનેક દેશો પરસ્પર સંરક્ષણ સહયોગને વિસ્તારી રહ્યા છે. કુવૈત અને પાકિસ્તાન વચ્ચેનો આ કરાર પણ તે જ દિશામાં એક મહત્વપૂર્ણ પગલું તરીકે જોવામાં આવી રહ્યો છે.
