Last Updated on by Sampurna Samachar
દેશના ઘણાં ક્ષેત્ર પર થશે અસર
ઈન્ફોસિસ અને TCS જેવી કંપનીઓને નાણાંકીય ભીડનો સામનો કરવો પડી શકે
(સંપૂર્ણ સમાચાર સેવા)
અમેરિકી રાષ્ટ્રપતિ ડોનાલ્ડ ટ્રમ્પ ૨ એપ્રિલથી તમામ દેશો પર ટેરિફ લાદવા જઈ રહ્યા છે. જેનાથી અબજો ડોલરના વૈશ્વિક વેપાર પર અસર થશે એટલું જ નહીં, ભારતીય નિકાસને પણ મોટો ફટકો પડી શકે છે. ટ્રમ્પના આ રેસિપ્રોકલ ટેરિફ (tariffs) ના સીધા નિશાના પર ભારત છે, જેને તે ‘ટેરિફ કિંગ‘ કહી ચૂક્યા છે. એવી આશંકા છે કે ટ્રમ્પ દ્વારા ટેરિફ લાદવાથી નિકાસને ૩૧ બિલિયન ડૉલર સુધીનું સંભવિત નુકસાન થઈ શકે છે.
કારથી લઈને જેનરિક સુધી ટ્રમ્પ દ્વારા રેસિપ્રોકલ ટેરિફ લાદવાની વ્યાપક અસર થઈ શકે છે. તાજેતરમાં ટ્રમ્પ આયાતી કાર અને ઓટો પાર્ટ્સ પર ટેરિફ લાદવાની જાહેરાત કરી હતી. હવે ફાર્માસ્યુટિકલ્સ, ઇલેક્ટ્રોનિક્સ, જેમ્સ અને જ્વેલરી જેવા ક્ષેત્રોનો વારો છે.
ટ્રમ્પના ટેરિફની ભારત પર અસર થવાની શક્યતા વધારે
નાણાકીય વર્ષ ૨૦૨૪ માં ભારતની અમેરિકામાં કુલ નિકાસ $૭૭.૫ બિલિયન રહી હતી, જ્યારે અમેરિકાની ભારતમાં નિકાસ $૪૦.૭ બિલિયન રહી હતી. અમેરિકા ભારતમાં ત્રીજા નંબરનું સૌથી મોટું રોકાણકાર છે. આના કારણે ૨૦૦૦ થી અત્યાર સુધી ૬૭.૭૬ બિલિયન ડૉલરનું FDI થયું છે, તેથી ટ્રમ્પના ટેરિફની ભારત પર અસર થવાની શક્યતા પણ વધારે છે.
એવી અપેક્ષા રાખવામાં આવે છે કે ટેરિફની દેશના ફાર્માસ્યુટિકલ સેક્ટર પર વધુ અસર પડશે. હાલમાં અમેરિકા ફાર્માની આયાત પર ન્યૂનતમ ટેરિફ લાદે છે. ભારત અમેરિકન ફાર્મા પ્રોડક્ટ્સ પર ૧૦ ટકા ટેરિફ લાદે છે. આવી સ્થિતિમાં, હવે આ ક્ષેત્ર પણ સીધા રેસિપ્રોકલ ટેરિફના દાયરામાં આવશે.
ઉદ્યોગ નિષ્ણાતોએ આ અંગે ચિંતા વ્યક્ત કરી છે અને કહ્યું છે કે વિતરકો અને ઉત્પાદકો માટે વધારાના ખર્ચનો બોજ ઉઠાવવો મુશ્કેલ બનશે. ભારત યુ.એસ.માં જેનરિક દવાઓનો સૌથી મોટો સપ્લાયર હોવાથી, કોઈપણ ઘટાડો તાત્કાલિક થવાને બદલે ધીમે ધીમે થવાની શક્યતા છે. અન્ય ઘણા નિષ્ણાતો એમ પણ કહે છે કે ઘણી ભારતીય ફાર્મા કંપનીઓ યુ.એસ.માં પહેલાથી જ ઓછા નફાના માર્જિન (૫ થી ૨૦ ટકાની વચ્ચે) પર કામ કરી રહી છે, તેથી તેમણે ઉચ્ચ ટેરિફ લાદતા પહેલા તેમની ઉત્પાદન વ્યૂહરચના પર પુનર્વિચાર કરવાની જરૂર છે.
ટ્રમ્પ દ્વારા રેસિપ્રોકલ ટેરિફ લગાવ્યા દરમિયાન સન ફાર્મા, સિપ્લા, લ્યુપિન, ડૉ. રેડ્ડીઝ, ડિવીઝ લેબ્સના શેરો પર નજર રાખવાની જરૂર છે. આ સિવાય ડિક્સન ટેક્નોલોજિસ અને કેનેસ ટેક જેવી ટેક કંપનીઓના શેરની સાથે ગોલ્ડ અને જ્વેલરી સેગમેંટમાં માલાબાર ગોલ્ડ, રેનેસા જ્વેલરી, રાજેશ એક્સપોર્ટ્સ અને કલ્યાણ જ્વેલર્સ પર પણ નજર રાખવાની જરુર છે. આ સાથે, અમેરિકા અને ભારત વચ્ચેના વેપારને લઈને વધતા તણાવ અને ગ્રાહકો દ્વારા ઓછા ખર્ચને કારણે ઈન્ફોસિસ અને TCS જેવી કંપનીઓને નાણાકીય સંકટનો સામનો કરવો પડી શકે છે.
