સાઉદી અરેબિયામાં ૨૫ લાખ પાકિસ્તાનીઓનો વસવાટ
(સંપૂર્ણ સમાચાર સેવા)
ખાડી દેશોમાં પાકિસ્તાનના ભિખારીઓની ફરિયાદ અવાર નવાર સામે આવે છે. જેમાં સાઉદી અરેબિયા,યુનાઈટેડ આરબ અમીરાત , કતાર જેવા દેશો પાકિસ્તાની ભિખારીઓથી પરેશાન છે અને દરરોજ પાકિસ્તાનને તેની ફરિયાદ કરી રહ્યા છે. ત્યારે તાજેતરમાં સાઉદી અરેબિયામાં ૧૦ પાકિસ્તાની ભિખારી ઝડપાયા હતા . આ ભિખારીઓ ઉમરાહ વિઝા પર સાઉદીના પવિત્ર શહેર મક્કા ગયા અને ત્યાં ભીખ માંગવા લાગ્યા.
પાકિસ્તાનની ગુપ્તચર એજન્સી ફેડરલ ઇન્વેસ્ટિગેટિવ એજન્સી (FIA) એ એક નિવેદન જારી કરીને કહ્યું કે સાઉદી અરેબિયાએ ઉમરાહ વિઝા પર ભીખ માંગનારા ૧૦ પાકિસ્તાનીઓને પરત મોકલી દીધા છે. આ તમામ ભિખારીઓ કરાંચીના જિન્ના ઇન્ટરનેશનલ એરપોર્ટ પર ઉતરતાની સાથે જ પોલીસ કસ્ટડીમાં લેવામાં આવ્યા હતા.
છેલ્લા કેટલાક વર્ષોમાં સાઉદી અરેબિયાએ વારંવાર પાકિસ્તાન સાથે ભિખારીઓનો મુદ્દો ઉઠાવ્યો છે. નવેમ્બર ૨૦૨૩ માં, પાકિસ્તાનના ગૃહ પ્રધાન મોહસિન નકવીએ કહ્યું હતું કે ભીખ માંગવા માટે હજ અને ઉમરાહ વિઝાનો ઉપયોગ કરી રહેલા પાકિસ્તાનીઓ વિરુદ્ધ દેશભરમાં વ્યાપક કાર્યવાહી શરૂ કરવામાં આવી છે.
પાકિસ્તાની પોલીસ દ્વારા અટકાયત કરાયેલા ૧૦ ભિખારીઓ છેલ્લા ઘણા મહિનાઓથી સાઉદી અરેબિયામાં ભીખ માંગી રહ્યા હતા. ભિખારીઓ સામે આગળની કાર્યવાહી માટે તેમને કરાચી એન્ટી હ્યુમન ટ્રાફિકિંગ સર્કલમાં મોકલવામાં આવ્યા છે.
FIA એ કહ્યું કે તે એરપોર્ટ પર ઈમિગ્રેશન ગતિવિધિઓ પર ચાંપતી નજર રાખી રહી છે. વિદેશ પ્રવાસે જતા મુસાફરોનું કડક ચેકિંગ કરવામાં આવી રહ્યું છે અને જેઓ ભીખ માંગવા માટે વિદેશ જતા હોવાની આશંકા છે તેમની સામે કાયદેસરની કાર્યવાહી કરવામાં આવી રહી છે.સાઉદી અરેબિયામાં ૨૫ લાખ પાકિસ્તાનીઓ રહે છે અને કુલ વિદેશીઓમાં પાકિસ્તાનીઓ બીજા સ્થાને છે. આ વિદેશી પાકિસ્તાનીઓ ત્યાં પૈસા કમાય છે અને તેને દેશમાં પાછા મોકલે છે, જે પાકિસ્તાનના વિદેશી મુદ્રા ભંડારમાં ફાળો આપે છે.
સાઉદી અરેબિયામાં ભીખ માંગવી એ એક અપરાધ છે જેના માટે સજાની સાથે દંડની જોગવાઈ છે. ૨૦૨૧ માં, સાઉદી અરેબિયાએ ભીખ માંગવા પર પ્રતિબંધ મૂકવા માટે એક કડક કાયદો અમલમાં મૂક્યો હતો, જે હેઠળ ભીખ માંગવા અથવા જૂથનું સંચાલન કરવા માટે મહત્તમ એક વર્ષની સજા અને એક લાખ સાઉદી રિયાલ (રૂ. ૨૩ લાખ ૨૩ હજાર ૨૬૧) ના દંડની જોગવાઈ છે.
ભિખારીઓ કાયદા અનુસાર, જો કોઈ વ્યક્તિ કોઈ પણ રીતે ભીખ માંગવાનું પ્રોત્સાહન આપે છે અથવા પૈસા વગેરે આપીને ભિખારીઓની મદદ કરે છે, તો તેને વધુમાં વધુ છ મહિનાની જેલ અને ૫૦ હજાર સાઉદી રિયાલનો દંડ ભરવો પડી શકે છે.
કાયદામાં એવી જોગવાઈ છે કે વિદેશી ભિખારીઓને તેમની સજા પૂરી કરીને અને દંડ ભરીને તેમના દેશમાં પાછા મોકલવામાં આવે છે. તે એમ પણ કહે છે કે દોષિત વિદેશી ભિખારીઓ ફરી ક્યારેય કામ કરવા માટે સાઉદી અરેબિયા પાછા ફરી શકશે નહીં. જોકે, વિદેશી ભિખારી જેઓ સાઉદી મહિલા સાથે લગ્ન કરે છે અથવા સાઉદી અરેબિયામાં બાળકો ધરાવે છે તેમને દેશનિકાલમાંથી મુક્તિ આપવામાં આવે છે.
