Last Updated on by Sampurna Samachar
ભારત સરકારનો રાજ્યો અને કેન્દ્ર શાસિત પ્રદેશોને આદેશ
દર મહિનાની ૧૫ તારીખે કેન્દ્ર સરકારને રિપોર્ટ કરવો ફરજીયાત
(સંપૂર્ણ સમાચાર સેવા)
ગૃહ મંત્રાલય દ્વારા બાંગ્લાદેશ અને મ્યાનમારથી આવેલા સંદિગ્ધ ગેરકાયદેસર પ્રવાસીઓની ઓળખ અને તેમના દસ્તાવેજોની તપાસ માટે રાજ્યો અને કેન્દ્ર શાસિત પ્રદેશોને ૩૦ દિવસની સમય મર્યાદા આપવામાં આવી છે. જેમાં તેઓ ૩૦ દિવસમાં ખુદની ભારતીય નાગરિકતા સાબિત કરે. મંત્રાલયના નિર્દેશો અનુસાર જો ૩૦ દિવસની અંદર દસ્તાવેજોની પુષ્ટિ નહીં થાય તો તેમને દેશમાંથી હાંકી કાઢવામાં આવશે.
આ મહિને જાહેર કરાયેલા નિર્દેશોમાં, ગૃહ મંત્રાલયે રાજ્યો અને કેન્દ્રશાસિત પ્રદેશોને તેમની વૈધાનિક શક્તિઓનો ઉપયોગ કરીને ગેરકાયદેસર સ્થળાંતર કરનારાઓની ઓળખ, તપાસ અને દેશનિકાલની પ્રક્રિયા શરૂ કરવા જણાવ્યું છે.
ગેરકાયદેસર ઇમિગ્રન્ટ્સ સામે કેન્દ્ર સરકારની કાર્યવાહી
ઉપરાંત, મંત્રાલયે તમામ રાજ્યોને જિલ્લા સ્તરે પૂરતા પ્રમાણમાં અટકાયત કેન્દ્રો સ્થાપવાનો નિર્દેશ આપ્યો છે જ્યાં શંકાસ્પદ સ્થળાંતર કરનારાઓને દેશનિકાલ પ્રક્રિયા પૂર્ણ ન થાય ત્યાં સુધી રાખવામાં આવશે. આ પગલું કેન્દ્ર સરકારની નીતિનો એક ભાગ છે જેના હેઠળ બાંગ્લાદેશ અને મ્યાનમારથી ગેરકાયદેસર ઇમિગ્રન્ટ્સ સામે કડક કાર્યવાહી કરવામાં આવી રહી છે.
ગૃહ મંત્રાલયે પોતાના નિર્દેશોમાં કહ્યું છે કે તમામ રાજ્યો અને કેન્દ્રશાસિત પ્રદેશોએ બાંગ્લાદેશી નાગરિકો અને રોહિંગ્યા સ્થળાંતર કરનારાઓનો રેકોર્ડ રાખવો પડશે, જેમને દેશનિકાલ માટે બોર્ડર સિક્યુરિટી ફોર્સ (BSF) અને કોસ્ટ ગાર્ડને સોંપવામાં આવે છે, એમ જાણવા મળ્યું છે. આ ઉપરાંત, દર મહિનાની ૧૫ તારીખે કેન્દ્ર સરકારને આ સંદર્ભે રિપોર્ટ સુપરત કરવો ફરજિયાત રહેશે.
મંત્રાલયે ઇમિગ્રેશન (Immigration) બ્યુરોને દેશનિકાલ કરાયેલા વ્યક્તિઓની યાદી જાહેર પોર્ટલ પર પ્રકાશિત કરવાનો પણ નિર્દેશ આપ્યો છે. આધાર નંબર, મતદાર ઓળખ કાર્ડ અને પાસપોર્ટ જારી કરવાથી રોકવા માટે આ ડેટા યુનિક આઇડેન્ટિફિકેશન ઓથોરિટી ઓફ ઇન્ડિયા (UIDAI), ચૂંટણી પંચ અને વિદેશ મંત્રાલય સાથે શેર કરવામાં આવશે. જો ગેરકાયદેસર સ્થળાંતર કરનારાઓ પાસે પહેલાથી જ આવા દસ્તાવેજો હશે, તો તેમને નિષ્ક્રિય કરવામાં આવશે અને સંબંધિત લાભો બંધ કરવામાં આવશે.
