Last Updated on by Sampurna Samachar
અમેરિકાના ગુપ્ત રિપોર્ટમાં ચોંકાવનારો ખુલાસો
ઈરાનની સેના સંપૂર્ણપણે તબાહ થઇ ગઇ , ટ્રમ્પે કહ્યું
(સંપૂર્ણ સમાચાર સેવા)
અમેરિકા અને ઈઝરાયલના ભીષણ હુમલા છતાં ઈરાનની સૈન્ય શક્તિ સંપૂર્ણપણે ખતમ થઈ નથી. અમેરિકાના જ એક ઇન્ટેલિજન્સ રિપોર્ટ્સ અનુસાર, હોર્મુઝ સ્ટ્રેટ જેવા વ્યૂહાત્મક વિસ્તારમાં ઈરાનની અનેક મિસાઈલ સાઈટ્સ હજુ પણ કાર્યરત છે, જે ટ્રમ્પ વહીવટી તંત્રના દાવા સામે સવાલો ઊભા કરે છે.
હોર્મુઝ સ્ટ્રેટ પાસેની ૩૩ મિસાઈલ સાઈટ્સમાંથી ૩૦ સાઈટ્સ હજુ પણ ઓપરેશનલ અથવા આંશિક રીતે સક્રિય છે. ઈરાન તેના ૭૦% મોબાઈલ મિસાઈલ લોન્ચર અને ૭૦% મિસાઈલ સ્ટોક (યુદ્ધ પહેલાનો જથ્થો) બચાવવામાં સફળ રહ્યું છે. લગભગ ૯૦% અંડરગ્રાઉન્ડ મિસાઈલ સ્ટોરેજ ફરીથી સક્રિય થઈ ગયા હોવાનું મનાય છે. આ એ જ વિસ્તાર છે જ્યાંથી વિશ્વનો ૨૦% ક્રૂડ ઓઈલ પુરવઠો પસાર થાય છે, જેનો અર્થ છે કે અમેરિકન જહાજો પરનો ખતરો હજુ ટળ્યો નથી.
આગામી લશ્કરી વ્યૂહરચના અંગે નવી ચર્ચા
અમેરિકન પ્રમુખ ડોનાલ્ડ ટ્રમ્પ અને સંરક્ષણ મંત્રી પીટ હેગસેથે દાવો કર્યો હતો કે ઈરાનની સેના સંપૂર્ણપણે તબાહ થઈ ચૂકી છે અને તે વર્ષો સુધી લડી શકે તેમ નથી. રિપોર્ટ મુજબ, આ હુમલા દરમિયાન ઘણી જગ્યાએ અંડરગ્રાઉન્ડ સિસ્ટમનો નાશ કરવાને બદલે માત્ર એન્ટ્રી પોઈન્ટ્સ જ બંધ કરાયા હતા કારણ કે, બંકર-બસ્ટર હથિયારોનો સ્ટોક મર્યાદિત હતો.
યુદ્ધ દરમિયાન અમેરિકાએ અત્યાધુનિક શસ્ત્રસરંજામનો ઉપયોગ કર્યો હતો, જેમાં ૧૧૦૦ લોંગ-રેન્જ ક્રૂઝ મિસાઈલ, ૧૦૦૦ થી વધુ ટોમહોક મિસાઈલ, ૧૩૦૦થી વધુ પેટ્રિયટ ઈન્ટરસેપ્ટર પણ સામેલ હતા. આ શસ્ત્રોનો સ્ટોક ઘટવાને કારણે અમેરિકાના સાથી દેશો (જેમ કે યુક્રેન) ને મળતા સપ્લાય પર અસર પડવાની ભીતિ સેવાઈ રહી છે.
વ્હાઇટ હાઉસના પ્રવક્તાએ આ રિપોર્ટને નકારી કાઢતા જણાવ્યું છે કે, ઈરાનની તાકાત વિશેના આવા અહેવાલો માત્ર ભ્રમ અથવા ઈરાનનો પ્રચાર છે. જો કે, આ રિપોર્ટે મિડલ ઈસ્ટની રાજનીતિ અને આગામી લશ્કરી વ્યૂહરચના અંગે નવી ચર્ચા છેડી દીધી છે.
