Last Updated on by Sampurna Samachar
આ પ્રયોગ પહેલીવાર થયો ને સફળ રહ્યો
મનુષ્યો માટે શ્રેષ્ઠ અંગ દાતા તરીકે ડુકકર જોવા મળ્યું
(સંપૂર્ણ સમાચાર સેવા)
ચીનના ડૉકટરોએ એક અદ્ભુત કામ કરી લોકોને ચોંકાવી દીધા છે. જેમાં ચીનના ડૉક્ટરોએ પહેલીવાર જિનેટિકલી મોડિફાઈડ ભુંડના લિવરનું માનવમાં ટ્રાન્સપ્લાન્ટ કર્યું છે. આ ટ્રાન્સપ્લાન્ટ બ્રેઈન ડેડ વ્યક્તિમાં કરવામાં આવ્યું છે. ત્યારે ડોક્ટરોનું આ પરાક્રમ ભવિષ્યમાં દર્દીઓની સારવારમાં મદદરૂપ થશે. છેલ્લા કેટલાક વર્ષોમાં, ભુંડને મનુષ્યો માટે શ્રેષ્ઠ અંગ દાતા તરીકે જોવામાં આવે છે. અમેરિકન તબીબોએ તાજેતરમાં ભુંડની કિડની અને હાર્ટ ટ્રાન્સપ્લાન્ટ કરવામાં સફળતા મેળવી છે.
મળતી માહિતી મુજબ ચીનના ઝિઆનમાં મિલિટરી મેડિકલ યુનિવર્સિટીના ડૉક્ટરોએ નેચર મેગેઝિનના એક અભ્યાસમાં આ સફળતાની માહિતી આપી છે. ભુંડના લિવરનું માનવ શરીરની અંદર પહેલાં ક્યારેય પરીક્ષણ કરવામાં આવ્યું ન હતું. આ ટ્રાન્સપ્લાન્ટ પછી, સંશોધકોને આશા છે કે આનુવંશિક રીતે સંશોધિત ડુક્કર ગંભીર રીતે બીમાર દર્દીઓને અસ્થાયી રાહત તો આપી જ શકે છે.
ડુક્કરનુ લિવરે સફળતાપૂર્વ કામ કર્યુ
૧૦ માર્ચ, ૨૦૨૪ ના રોજ, એક નાના ડુક્કરનું લિવર બ્રેઈન ડેડ પુખ્ત વ્યક્તિમાં ટ્રાન્સપ્લાન્ટ કરવામાં આવ્યું હતું. આ લિવરને સુધારવા માટે જનીનમાં ફેરફાર કરવામાં આવ્યો હતો. ડૉક્ટરોએ કહ્યું કે પરિવારની વિનંતી પર ૧૦ દિવસ પછી ટ્રાયલ સમાપ્ત કરવામાં આવી હતી. ડૉક્ટરોએ દર્દીનું નામ, લિંગ અને અન્ય વિગતોની જાણકારી આપી નથી.
દર્દીનું મૂળ લિવર હાજર હતું અને આ પ્રકારના ટ્રાન્સપ્લાન્ટ (transplant) ને સહાયક ટ્રાન્સપ્લાન્ટ કહેવામાં આવે છે. ૧૦ દિવસમાં, ડોકટરોએ લિવરના રક્ત પ્રવાહ, પિત્તનું ઉત્પાદન, રોગપ્રતિકારક પ્રતિક્રિયા અને અન્ય મુખ્ય કાર્યોનું નિરીક્ષણ કર્યું. હોસ્પિટલના લિન વાંગે એક પ્રેસ કોન્ફરન્સમાં જણાવ્યું હતું કે ડુક્કરનું લિવર “ખૂબ સારી રીતે કામ કરી રહ્યું છે” અને “સરળ રીતે પિત્ત ઉત્પન્ન કરી રહ્યું છે.” તે મુખ્ય પ્રોટીન આલ્બ્યુમિન પણ ઉત્પન્ન કરતું હતું. તેમણે તેને ‘મોટી સિદ્ધિ’ ગણાવી જે ભવિષ્યમાં લિવરની સમસ્યાવાળા દર્દીઓને મદદ કરી શકે.
