હવે FASTAG નહીં પણ GNSS દ્વારા ટોલ ટેક્સ સીધો બેન્ક ખાતાંમાંથી કપાશે

Last Updated on 18/04/2025 by Sampurna Samachar

Contents

વધુ પડતો ટેક્સ કપાઇ જવાની ફરિયાદમાંથી મળશે મુક્તિ કેન્દ્ર સરકાર ૧ મે ૨૦૨૫ થી કરશ લાગુ ગાડીમાં સરકાર દ્વારા રજિસ્ટર્ડ GPS ડિવાઈસ લગાવાશે નવી સિસ્ટમના ફાયદા

વધુ પડતો ટેક્સ કપાઇ જવાની ફરિયાદમાંથી મળશે મુક્તિ

કેન્દ્ર સરકાર ૧ મે ૨૦૨૫ થી કરશ લાગુ

(સંપૂર્ણ સમાચાર સેવા)

દેશમાં નેશનલ હાઈવે પર વસૂલાતા ટોલ ટેક્સ પર સરકારે મોટો ર્નિણય લીધો છે. કેન્દ્ર સરકાર ૧ મે, ૨૦૨૫ થી FASTAG ના સ્થાને એક નવી સેટેલાઈટ આધારિત ટોલ કલેક્શન સિસ્ટમ શરૂ કરવા જઈ રહી છે. કેન્દ્રીય માર્ગ પરિવહન મંત્રી નીતિન ગડકરીએ આ અંગે માહિતી આપી હતી. આગામી ૧૫ દિવસમાં નવી ટોલ નીતિ રજૂ કરાશે. જે પ્રવાસીઓ માટે વધુ અનુકૂળ અને સંતોષજનક રહેશે. આ સુવિધાથી વધુ પડતો ટોલ ટેક્સ કપાઈ જવાની ફરિયાદોમાંથી મુક્તિ મળશે. ટોલ ટેક્સમાં પારદર્શિતા વધશે.

સરકાર જે નવી ટોલ સિસ્ટમની વાત કરી રહી છે, તેનું નામ છે ગ્લોબલ નેવિગેશન સેટેલાઈટ સિસ્ટમ (GNSS). આ એક GPS આધારિત પ્રણાલી છે. જેમાં વાહનનું લોકેશન સેટેલાઈટની મદદથી ટ્રેક કરવામાં આવશે. અને તેના આધારે અંતર અનુસાર ટોલ ચાર્જ સીધો બેન્ક એકાઉન્ટમાંથી કપાશે. એટલે હવે ટોલ પ્લાઝા પર રોકાવાની કે રાહ જોવાની જરૂર પડશે નહીં.

ગાડીમાં સરકાર દ્વારા રજિસ્ટર્ડ GPS ડિવાઈસ લગાવાશે

GNSS પ્રણાલીમાં કેશના સ્થાને ડિજિટલ પેમેન્ટ હોય છે. પરંતુ તેમાં વ્હિકલને ટોલ બૂથ પર અટકાવવુ પડે છે. ઘણીવખત લાંબી કતારોમાં રાહ પણ જોવી પડે છે. જ્યારે GNSS પ્રણાલી વર્ચ્યુઅલ ટોલ બૂથ મારફત કામ કરે છે. જેમાં ટોલની ગણના વાહનના ટ્રેકિંગના આધારે થાય છે. અને બેન્ક ખાતામાંથી સીધી ચૂકવણી થાય છે. આ પ્રણાલી અગાઉ ૧ એપ્રિલે લાગુ થવાની હતી. પરંતુ અમુક ટેક્નિકલ અને પ્રશાસનિક કારણોસર તેનો અમલ સ્થગિત કરવામાં આવ્યો હતો. હવે ૧ મે, ૨૦૨૫થી સંપૂર્ણ દેશમાં આ સિસ્ટમ લાગુ કરાશે.

ફાસ્ટેગનો ઉપયોગ કરતાં લોકો ૩૦ એપ્રિલ, ૨૦૨૫ સુધી જ તેનો ઉપયોગ કરી શકશે. બાદમાં પોતાની ગાડીમાં સરકાર દ્વારા રજિસ્ટર્ડ GPS ડિવાઈસ લગાવવામાં આવશે. આ નવી સિસ્ટમને બેન્ક ખાતા સાથે લિંક કરવામાં આવશે. સિસ્ટમ સંપૂર્ણપણે ચાલુ થઈ ગયા બાદ ફાસ્ટેગ સ્ટિકર હટાવી દેવામાં આવશે. સરકારે જીપીએસ ઈન્સ્ટોલેશન અને નવી સિસ્ટમ સમજાવવા માટે જાગૃત્તિ અભિયાન ચલાવવાની તૈયારી કરી છે. ખાનગી કાર માલિકોથી માંડી ટ્રક અને ટ્રાન્સપોર્ટ સેક્ટર સુધી તમામ માટે આ સ્માર્ટ સિસ્ટમ સુવિધાજનક સાબિત થશે.