Last Updated on by Sampurna Samachar
સર્ચ ઓપરેશન ૭૨ કલાક પછી પણ ચાલુ રહેશે
ચીન, ભારત અને થાઇલેન્ડે મ્યાનમારમાં રાહત સામગ્રી મોકલાવી
(સંપૂર્ણ સમાચાર સેવા)
મ્યાનમારમાં આવેલા ભયાનક ભૂકંપમાં અત્યાર સુધી લગભગ ૨૦૦૦ લોકો માર્યા ગયા હોવાના અહેવાલ મળી રહ્યા છે. ચીની મીડિયાના અહેવાલ અનુસાર, મ્યાનમાર (Myanmar) માં ભૂકંપમાં ધરાશાયી થયેલી ઇમારતોમાં ફસાયેલા ચાર લોકોને બચાવી લેવામાં આવ્યા છે. મ્યાનમાર અને થાઇલેન્ડમાં રાહત બચાવકર્મીઓ ફસાયેલ જીવિત લોકોને બહાર કાઢવાનો પ્રયાસ કરી રહ્યા છે.
ન્યૂઝ એજન્સી સિન્હુઆએ કહ્યું હતું કે માંડલેમાં કાટમાળમાંથી બચાવાયેલા લોકોમાં એક ગર્ભવતી મહિલા અને એક છોકરીનો સમાવેશ થાય છે. માંડલે આવેલા ૭.૭ ની તીવ્રતાના ભૂકંપના કેન્દ્રબિંદુની નજીક છે. ભૂકંપે મ્યાનમારમાં મોટા પાયે વિનાશ વેર્યો હતો અને પાડોશી થાઇલેન્ડમાં પણ ભૂકંપના કારણે કેટલાક લોકોના મોત થયા છે.
હજુ પણ લોકો નીચે જીવિત હોઈ શકે
ચીન, ભારત અને થાઇલેન્ડે મ્યાનમારમાં રાહત સામગ્રી અને ટીમો મોકલી છે. સાથે સાથે મલેશિયા, સિંગાપોર અને રશિયાએ રાહત સામગ્રી અને બચાવકર્મીઓ મોકલ્યા છે. સિન્હુઆએ કહ્યું હતું કે ચીન સર્ચ એન્ડ રેસ્ક્યૂ ટીમના પ્રથમ ટીમના વડા યૂ શિને કહ્યું હતું કે તેનાથી કોઇ ફરક નથી પડતો કે અમે કેટલા સમય સુધી કામ કરીએ છીએ. સૌથી મહત્વની બાબત એ છે કે આપણે સ્થાનિક લોકોમાં આશા લાવી શકીએ છીએ.
થાઇલેન્ડની રાજધાની બેંગકોકમાં ક્રેન અને ડોગ સ્નિફર્સનો ઉપયોગ કરીને કટોકટીના ક્રૂએ ઇમારતના કાટમાળ નીચે દટાયેલા માનવામાં આવતા ૭૬ લોકોની શોધ ચાલુ રાખી હતી. બેંગકોકના ગવર્નરએ જણાવ્યું હતું કે લોકોને જીવતા શોધવા માટે બચાવકર્તાઓ ખૂબ મહેનત કરી રહ્યા છે. સર્ચ ઓપરેશન ૭૨ કલાક પછી પણ ચાલુ રહેશે કારણ કે તુર્કીમાં એક અઠવાડિયાથી ફસાયેલા લોકો બચી ગયા છે.
તેમણે કહ્યું કે કાટમાળના મશીન સ્કેનથી જાણવા મળ્યું છે કે હજુ પણ લોકો નીચે જીવિત હોઈ શકે છે અને તેમના સ્થાનો શોધવા માટે સ્નિફર ડોગની મદદ લેવામાં આવી રહી છે. થાઈલેન્ડનો સત્તાવાર મૃત્યુઆંક ૧૮ હતો, પરંતુ ધરાશાયી થયેલી ઇમારતના સ્થળે વધુ બચાવ કામગીરી ન થાય તો તે વધી શકે છે.
મ્યાનમારમાં મીડિયાએ જણાવ્યું હતું કે ઓછામાં ઓછા ૧૭૦૦ લોકોના મૃત્યુની પુષ્ટી કરવામાં આવી છે. વોલ સ્ટ્રીટ જર્નલે લશ્કરી શાસકને ટાંકીને અહેવાલ આપ્યો છે કે મ્યાનમારમાં મૃત્યુઆંક ૨,૦૨૮ પર પહોંચી ગયો છે. રોઇટર્સ તાત્કાલિક નવા મૃત્યુઆંકની પુષ્ટી કરી શક્યું નથી. સંયુક્ત રાષ્ટ્રએ કહ્યું કે તે મધ્ય મ્યાનમારમાં બચી ગયેલા લોકો માટે રાહત પુરવઠો પહોંચાડી રહ્યું છે.
અમેરિકાએ “મ્યાનમાર સ્થિત માનવતાવાદી સહાય સંસ્થાઓ દ્વારા” ૨ મિલિયન ડોલરની સહાયનું વચન આપ્યું છે. એક નિવેદનમાં કહેવામાં આવ્યું છે કે ટ્રમ્પ વહીવટ હેઠળ મોટા પાયે કાપ મુકી રહેલા USAID ની એક ટીમ મ્યાનમારમાં તૈનાત કરવામાં આવી રહી છે. એક બળવાખોર જૂથે કહ્યું કે ભૂકંપ પછી મ્યાનમારનું સૈન્ય હજુ પણ ગામડાઓ પર હવાઈ હુમલા કરી રહી છે અને સિંગાપોરના વિદેશ મંત્રીએ રાહત પ્રયાસોમાં મદદ કરવા માટે તાત્કાલિક યુદ્ધવિરામની હાકલ કરી હતી. ૫૫ મિલિયન વસ્તી ધરાવતા દેશમાં પુલ, હાઇવે, એરપોર્ટ અને રેલવે સહિત મહત્વપૂર્ણ માળખાકીય સુવિધાઓને નુકસાન થયું છે.
