AMC ના સત્તાધીશોએ શહેરને બચાવવા શહેરમાં પોલ્યુશન સેન્સર લગાવવાનો લીધો નિર્ણય
(સંપૂર્ણ સમાચાર સેવા)
અમદાવાદ શહેરનાં વિવિધ વિસ્તારોમાં ધૂળ અને ધુમાડાનાં કારણે વાયુ પ્રદુષણ દિનપ્રતિદિન વધતુ જઇ રહ્યું છે અને તેમાંય ખાસ કરીને પૂર્વ તથા દક્ષિણ ઝોનમાં તો પ્રદુષણની માત્રા અસહ્ય બની રહી હોવાથી મ્યુનિ. સત્તાધીશોએ પર્યાવરણની જાળવણી કાજે ઠેર ઠેર પોલ્યુશન સેન્સર લગાવવાનો અને જ્યાં પણ પોલ્યુશન વધ્યાની જાણ થશે ત્યાં હવામાં પાણીનાં ફુવારા છોડતી મિસ્ટવાન દોડાવવાનો ર્નિણય લીધો છે.
મ્યુનિ. સ્ટે.કમિટીની બેઠક બાદ ચેરમેન દેવાંગભાઇ દાણીએ જણાવ્યું હતું કે, શહેરનાં પશ્ચિમ વિસ્તારમાં ધૂળ અને રજકણોનાં કારણે વાયુ પ્રદુષણમાં વધારો નોંધાયો છે, જ્યારે પૂર્વ અમદાવાદમાં ફેક્ટરીઓ-વાહનોનાં ધુમાડા તેમજ પીરાણા ડમ્પ સાઇટનાં કારણે વાયુ પ્રદુષણ વધી ગયુ છે. જેને ડામવા માટે અનેકવિધ પગલા લેવાઇ રહ્યાં છે. તેમણે કહ્યું કે, શહેરમાં વાયુ પ્રદુષણ ઘટાડવા માટે તેમજ તેનાથી ગરમીનુ પ્રમાણ વધે છે તેને અંકુશમાં લેવા માટે સૌપ્રથમ વૃક્ષારોપણ અને બાગબગીચા ડેવલપમેન્ટની કામગીરી પૂરજોશમાં હાથ ધરવામાં આવી છે.
તદઉપરાંત ઓપન સ્પેસ અને અન્ય ખુલ્લી જગ્યાઓમાં ઘનિષ્ઠ વનીકરણ કરવામાં આવ્યુ છે. આ સિવાય મ્યુનિ. દ્વારા જાહેર પરિવહન સેવામાં ઇલેક્ટ્રિક બસોનો ઉપયોગ શરૂ કરવામા આવ્યો છે અને નાગરિકો પણ ઇલેક્ટ્રિક વાહનોનો ઉપયોગ કરવા પ્રેરાય તે માટે વ્હિકલ ટેકસમાં રાહત સહિતના પગલા લેવામાં આવી રહ્યાં છે. તેમણે કહ્યું કે, શહેરી વાયુ પ્રદુષણ ઘટાડવા માટે કેન્દ્ર અને રાજ્ય સરકાર તરફથી ગ્રાન્ટ આપવામાં આવી રહી છે, તેનો સદઉપયોગ કરીને શહેરમાં પોલ્યુશન સેન્સર લગાવવામાં આવશે. તેમાં ખાસ કરીને પૂર્વ તથા દક્ષિણ ઝોનમાં વધુ સંખ્યામાં સેન્સર લગાવાશે.
અન્ય ઝોન અને વિસ્તારોમાં ૭૦૦ મીટરનાં અંતરે પોલ્યુશન સેન્સર લગાવાશે
શહેરમાં જેટલાં પોલ્યુશન સેન્સર લગાવાશે તેના માટે પાલડી સ્થિત સ્માર્ટ સિટીનાં કમાન્ડ સેન્ટરમાં અલાયદો કંટ્રોલરૂમ શરૂ કરાશે. જ્યાં જે તે વિસ્તારમાં પોલ્યુશન અમુક હદથી વધી જશે તેનુ એલાર્મ વાગે તેવી સિસ્ટમ ગોઠવાશે અને તરત જ હવામાં પાણીનાં ઝીણા ફુવારા છોડતી મિસ્ટવાન મોકલવામાં આવશે. આ મિસ્ટવાન વાયુ પ્રદુષણ વધારે હશે તેવા વિસ્તારમાં જઇ પાણીનાં ફુવારા છોડી ધૂળ-રજકણ અને ધુમાડાને જમીનદોસ્ત કરશે અને હવાને શુધ્ધ કરશે. જોકે મ્યુનિ. સૂત્રોએ સ્વીકાર્યુ હતું કે, શહેરમાં પૂર્વ અને દક્ષિણમાં ધૂળ, બાંધકામ સાઇટોમાંથી સિમેન્ટ-રેતીનાં રજકણ, વાહનો-ફેક્ટરીઓનાં ધુમાડા અને સુએજ ટ્રીટમેન્ટ પ્લાન્ટ તેમજ પીરાણા ડમ્પ સાઇટનાં કારણે સાંજ પડ્યે અતિ પ્રદુષિત વાતાવરણ છવાઇ જાય છે અને હાલમાં તો રાતનાં સમયે અમુક મીટરથી વધુનાં અંતરનુ જોઇ શકાય નહિ તેવુ પોલ્યુશન ફેલાઇ જાય છે. સૂત્રોએ સ્વીકાર્યુ હતું કે, શહેરમાં બાંધકામ અને જુની સ્કીમોની તોડફોડની સાથે ખુલ્લા પ્લોટ અને વોલ ટૂ વોલ રોડનાં અભાવનાં કારણે પણ વાયુ પ્રદુષણ વધે છે. તેના કારણે રાત્રે પાર્ક કરેલાં વાહનો ઉપર ધૂળ જામી ગયેલી જોવા મળે છે તે શહેરની હવામાં ધૂળ-રજકણનાં પ્રદુષણનુ ઉત્તમ ઉદાહરણ છે.
