અમેરિકામાં વાવાઝોડાએ તારાજી સર્જી , ક્યાંક વીજળી ગઇ તો ક્યાંક ઘરોનો નાશ

Last Updated on 17/03/2025 by Sampurna Samachar

વાવાઝોડામાં ૩૦ થી વધુ લોકોના મોતની માહિતી

આગામી સૂચના સુધી કટોકટીની સ્થિતિ લાદવામાં આવી

(સંપૂર્ણ સમાચાર સેવા)

અમેરિકા (AMERICA) ના ઘણા વિસ્તારોમાં ભીષણ વાવાઝોડાની અસર જોવા મળી રહી છે. જે વાવાઝોડામાં ઓછામાં ઓછા ૩૨ લોકોના મોત થયા હોવાનુ જાણવા મળી રહ્યુ છે. જે અધિકારીઓએ આ માહિતીની પુષ્ટિ કરી છે. મિઝોરી હાઇવે પર પેટ્રોલીંગ કરતી ટીમે જણાવ્યું હતું કે વાવાઝોડાને કારણે ફક્ત મિઝોરીમાં જ ૧૨ લોકો માર્યા ગયા છે.

મળતા અહેવાલ મુજબ, આ વાવાઝોડામાં ઘણા લોકો ઘાયલ પણ થયા છે. અરકાનસાસના અધિકારીઓએ જણાવ્યું હતું કે ઇન્ડિપેન્ડન્સ કાઉન્ટીમાં ત્રણ લોકો માર્યા ગયા છે, જ્યારે આઠ અન્ય કાઉન્ટીઓમાં ૫૦ થી વધુ લોકો ઘાયલ થયા છે. અરકાનસાસ ડિપાર્ટમેન્ટ ઓફ પબ્લિક સેફ્ટીએ એક નિવેદનમાં જણાવ્યું હતું કે રાજ્યભરના ૧૬ કાઉન્ટીઓમાં ઘરો અને વ્યવસાયોને નુકસાન થયું છે. આ સાથે, વીજ તાર અને વૃક્ષો પડવાની ઘણી ઘટનાઓ પણ નોંધાઈ છે.

હજુ બરફવર્ષાની ચેતવણી જાહેર કરાઇ

અધિકારીઓના જણાવ્યા અનુસાર, ટેક્સાસ પેનહેન્ડલમાં અમરિલો કાઉન્ટીમાં ધૂળના તોફાન દરમિયાન કાર અકસ્માતમાં સાત લોકોના મોત થયા છે. અગાઉ, મિઝોરી સ્ટેટ હાઇવે પેટ્રોલે જણાવ્યું હતું કે બેકર્સફિલ્ડ વિસ્તારમાં તોફાનને કારણે ઓછામાં ઓછા બે લોકો માર્યા ગયા છે અને ઘણા લોકો ઘાયલ થયા છે. સૌથી વધુ અસરગ્રસ્ત રાજ્યો મિઝોરી, અરકાનસાસ, ટેક્સાસ અને ઓક્લાહોમા છે. મિઝોરીમાં બધા રાજ્યોમાં સૌથી વધુ મૃત્યુ નોંધાયા છે, જેમાં ઓછામાં ઓછા ૧૨ લોકો મૃત્યુ પામ્યા છે.

મિઝોરીમાં બટલર કાઉન્ટી કોરોનર જીમ એકર્સે જણાવ્યું હતું કે બેકર્સફિલ્ડથી લગભગ ૧૭૭ માઇલ પૂર્વમાં એક ઘર વાવાઝોડાથી ધરાશાયી થતાં એક વ્યક્તિનું મોત થયું હતું. જોકે, બચાવ કાર્યકરો ઘરમાં હાજર એક મહિલાને સુરક્ષિત રીતે બહાર કાઢવામાં સફળ રહ્યા.

મેયર જોનાસ એન્ડરસને સોશિયલ મીડિયા પર માહિતી આપી હતી કે અરકાનસાસના કેવ સિટી વિસ્તારમાં પાંચ લોકો ઘાયલ થયા છે, જ્યાં આગામી સૂચના સુધી કટોકટીની સ્થિતિ લાદવામાં આવી છે. રાજ્યભરમાં ૧૩૦ થી વધુ આગ લાગી હોવાથી ઓક્લાહોમાના કેટલાક સમુદાયોના લોકોને સ્થળાંતર કરવાની સલાહ આપવામાં આવી છે.

અરકાનસાસના ગવર્નર સારાહ હુકાબીએ ઘાયલ લોકોને મદદ કરવા માટે આપત્તિ પુન:પ્રાપ્તિ ભંડોળ તરીકે ૨૫૦,૦૦૦ પણ જાહેર કર્યા છે. રાષ્ટ્રીય હવામાન સેવાએ દૂર પશ્ચિમ મિનેસોટા અને દૂર પૂર્વ દક્ષિણ ડાકોટાના ભાગો માટે બરફવર્ષાની ચેતવણી જારી કરી છે. આ વિસ્તારોમાં ૬ ઇંચ સુધી બરફ પડવાની સંભાવના છે, અને ૬૦ માઇલ પ્રતિ કલાકની ઝડપે પવન ફૂંકાશે તેવી પણ સંભાવના છે.