Last Updated on by Sampurna Samachar
જય બદ્રીનાથના જયકારા સાથે ભક્તોએ કર્યા દર્શન
હવે ચારેય ધામના કપાટ ભક્તોના દર્શન માટે ખુલી ગયા
(સંપૂર્ણ સમાચાર સેવા)
કેદારનાથ ધામ બાદ હવે બદ્રીનાથ ધામના કપાટ પણ ભક્તો માટે ખોલવામાં આવ્યા છે. બદ્રીનાથના સવારે ૬ વાગ્યે આર્મી બેન્ડના સુમધુર સૂરો સાથે કપાટ ખોલવામાં આવ્યા હતા. આ દરમિયાન ચારે તરફ જય જય બદ્રીનાથના જયકારા લગાવતા ભક્તોમાં ઉત્સાહ જોવા મળ્યો હતો. વાત કરીએ તો આ મંદિર હવે મે થી નવેમ્બર સુધી લોકો માટે ખુલ્લું રહેશે.
શિયાળા દરમિયાન મંદિર બંધ રહે છે અને તે દરમિયાન જોશીમઠના નરસિંહ મંદિરમાં ભગવાનની પૂજાનું આયોજન કરવામાં આવે છે. ગંગોત્રી અને યમુનોત્રી ધામના કપાટ ૩૦ એપ્રિલના રોજ ખુલ્યા હતા. કેદારનાથ ધામના કપાટ ૨ મેના રોજ ખોલવામાં આવ્યા હતા. આ સાથે હવે ચારેય ધામ ભક્તોના દર્શન માટે ખુલી ગયા છે.
કપાટ ખૂલતાં હેલિકોપ્ટરથી પુષ્પવર્ષા કરાઇ
ઉલ્લેખનીય છે કે કપાટ ખુલે તે પહેલાં જ ભક્તો ત્યાં પહોંચવાનું શરૂ કરી દીધું હતું. આ માટે મંદિર સમિતિના અધિકારીઓ અને કર્મચારીઓ સવારે ૪ વાગ્યે મંદિર પરિક્રમામાં હાજર રહ્યા હતા. આ પછી, સાંજે ૪:૩૦ વાગ્યે, શ્રી કુબેરજીનો દક્ષિણ દ્વારથી મંદિર પરિક્રમામાં પ્રવેશવાનો સમય થયો. જે બાદ સવારે ૫ કલાકે વિશેષ મહેમાનો, રાવળ, ધર્માધિકારી, વેદપાઠી, અધિકાર ધારકો, ડીમરી પંચાયતના પ્રતિનિધિઓ મંદિરે પહોંચ્યા હતા. અડધા કલાક પછી દ્વાર પૂજા શરૂ કરવાનું નક્કી થયું.
ત્યારે તમામ વિધિ સાથે સવારે ૬ વાગ્યે કપાટ ખોલવામાં આવ્યા હતા. આ દરમિયાન મંદિરને ફૂલોથી શણગારવામાં આવ્યું હતું. બદ્રીનાથ ધામના કપાટ ખોલ્યા પછી હેલિકોપ્ટરથી ફૂલોનો વરસાદ કરવામાં આવ્યો. આ સાથે ઉત્તરાખંડના મુખ્યમંત્રી પુષ્કર સિંહ ધામી પણ બદ્રીનાથ ધામ પહોંચ્યા હતા અને બદ્રીનાથ ધામમાં પૂજા કરી હતી.
