Last Updated on by Sampurna Samachar
વક્ફ બિલને સમર્થન આપતા બેનરને લઇ થયો હોબાળો
અગાઉ પણ કોંગ્રેસ નેતાની હાજરીમાં થયો હતો હોબાળો
(સંપૂર્ણ સમાચાર સેવા)
કોંગ્રેસની ‘પલાયન રોકો, નોકરી દો’ પદયાત્રામાં હોબાળો થયો હોવાનુ સામે આવ્યુ છે. જેમાં કોંગ્રેસ સાંસદ રાહુલ ગાંધી બેગૂસરાય જિલ્લામાં પહોંચી પદયાત્રામાં સામેલ થયા હતા. જોકે આ દરમિયાન તેમને એક યુવકના વિરોધનો સામનો કરવો પડ્યો છે. મળતી વિગતો મુજબ રાહુલની ઉપસ્થિતિમાં કોંગ્રેસ કાર્યકર્તાઓએ એક યુવકને માર માર્યો હતો. એટલું જ નહીં પૂર્વ કોંગ્રેસ પ્રદેશ અધ્યક્ષે યુવકને થપ્પડ મારી દીધી હતી.
મળતા અહેવાલો મુજબ જ્યારે રાહુલ ‘પલાયન રોકો, નોકરી દો’ પદયાત્રામાં ઉપસ્થિત હતા, ત્યારે એક યુવક વક્ફ બિલને સમર્થન આપવાની માંગ સંબંધીત એક પોસ્ટર લઈને આવ્યો હતો. આ કારણે કોંગ્રેસ (CONGRESS) કાર્યકર્તાઓ નારાજ થઈ ગયા અને યુવકને માર માર્યો હતો. રાહુલ સાથે પૂર્વ કોંગ્રેસ પ્રદેશ અધ્યક્ષ અખિલેશ પ્રસાદ સિંહ પણ હાજર હતા અને તેમણે પણ યુવકને થપ્પડ મારી દીધી હતી.
રાહુલ ગાંધીએ આ વર્ષે ત્રીજી વખત લીધી મુલાકાત
પદયાત્રામાં આવેલો યુવક ‘વક્ફ બોર્ડનું સમર્થન કરો રાહુલ ગાંધીજી’ લખેલું પોસ્ટર લઈને આવ્યો હતો. આ દરમિયાન કેટલાક કોંગ્રેસ કાર્યકર્તાઓએ તેનું સમર્થન કર્યું તો કેટલાકે યુવક પાસેથી પોસ્ટર ખેંચી ફાડી નાખ્યું હતું અને યુવકને ધક્કો મારી આશ્રમના ગેટમાંથી બહાર ભગાડી દીધો હતો.
કોંગ્રેસની પદયાત્રા બિહારના ભિતિહરવા આશ્રમથી ૧૬ મી માર્ચે શરૂ થઈ છે. જોકે યાત્રા દરમિયાન કોંગ્રેસને અનેક વખત વિરોધનો અને બબાલનો સામનો કરવો પડ્યો છે. આ પહેલા કોંગ્રેસ કાર્યકર્તાઓ, વિદ્યાર્થીઓ અને યુવા સંગઠનના સભ્યો પાર્ટીના ઝંડા સાથે રસ્તા પર ઉતરી આવ્યા હતા. તેમણે સંરક્ષણ દળોમાં ખાલી પદો ભરવાની તેમજ સરકારી નોકરીઓ વધારવાની માંગ કરી હતી.
રાહુલ ગાંધીએ આ વર્ષે ત્રીજી વખત બિહારની મુલાકાત લીધી છે. એટલું જ નહીં ૩૧ માર્ચે બિહારનાં અરરિયા જિલ્લામાં કોંગ્રેસની ‘પલાયન રોકો, નૌકરી દો યાત્રા’માં કોંગ્રેસ નેતા કન્હૈયા કુમાર સાથે સેલ્ફી લેવાના ચક્કરમાં ભારે બબાલ થઈ છે.
અહીં કેટલાક કાર્યકર્તાઓ કન્હૈયા કુમાર પાસે સેલ્ફી લેવા તેમની નજીક ગયા હતા. આ દરમિયાન તેમના સુરક્ષા કર્મીઓએ અટકાવવાનો પ્રયાસ કરતા કેટલાક કાર્યકર્તાને ધક્કો લાગતા મામલો બિચક્યો. તેથી સુરક્ષા કર્મીઓ અને કાર્યકર્તાઓ વચ્ચે મારામારી થયાનું પણ કહેવાય છે.
