Last Updated on by Sampurna Samachar
સુપ્રીમ કોર્ટે લગ્ન વિવાદમાં આપ્યો ચૂકાદો
પાયલટ અને તેના પરિવાર વિરુદ્ધ પત્નીએ નોંધાવી ફરિયાદો
(સંપૂર્ણ સમાચાર સેવા)
સુપ્રીમ કોર્ટે એક ફાઈટર પાઈલટ અને તેની પત્નીને સલાહ આપતા કહ્યું કે, એકબીજાને માફ કરો અને આગળ વધો. જેઓ લગ્ન વિવાદમાં ફસાયેલા છે. પાઈલટે ૨૦૧૯ ના બાલાકોટ એર સ્ટ્રાઈકમાં પણ ભાગ લીધો હતો. બીજી તરફ પત્ની IIM થી સ્નાતક છે અને એક IT ફર્મમાં કામ કરે છે.
જસ્ટિસ પીએસ નરસિન્હા અને અતુલ એસ ચંદુરકરની બેન્ચે દંપતીને કહ્યું કે, તમે પરસ્પર વિવાદનો શાંતિપૂર્ણ રીતે ઉકેલ લાવી દો. બદલાની જિંદગી ન જીવો. તમે બંને યુવાન છો અને તમારી સામે લાંબુ જીવન પડ્યું છે. તમારે સારું જીવન જીવવું જોઈએ. વાયુસેનાના અધિકારીની અરજી પર નોટિસ જારી કરતા બેન્ચે કહ્યું કે, તમે એકબીજાને માફ કરો. એકબીજાને ભૂલી જાઓ અને આગળ વધો. પાઈલટે આ અરજી પોતાની પત્ની દ્વારા નોંધાયેલી FIR રદ કરવા માટે દાખલ કરી છે.
ફરિયાદો કાનૂની પ્રક્રિયાનો ઘોર દુરુપયોગ છે
પાઈલટે પોતાની અરજીમાં કહ્યું કે, હું અને મારા પરિવારના સભ્યો મારી પત્ની અને સાસરિયાઓ દ્વારા સતત માનસિક ત્રાસનો શિકાર બની રહ્યા છે. પંજાબ અને હરિયાણા હાઈકોર્ટે FIR રદ કરવાની તેની અરજી ફગાવી દીધા બાદ વાયુસેનાના અધિકારીએ સુપ્રીમ કોર્ટનો દરવાજો ખખડાવ્યો છે. અરજીના સ્વરૂપને જોતા સુપ્રીમ કોર્ટે કહ્યું કે, તે દુશ્મનાવટના કેસ જેવું છે. કોર્ટે દંપતીને શાંતિપૂર્ણ રીતે વિવાદનો ઉકેલ લાવવા અને જીવનમાં આગળ વધવા કહ્યું.
અરજીમાં કહેવામાં આવ્યું છે કે, પત્ની વાયુસેનાના અધિકારી અને તેમના પરિવારના સભ્યો વિરુદ્ધ દિલ્હી અને હરિયાણાની વિવિધ કોર્ટમાં ખોટી ફરિયાદો અને કેસ દાખલ કરી રહી છે. જ્યારે તેમને કોર્ટમાંથી કોઈ રાહત ન મળી, ત્યારે તેમણે વાયુસેના અને સંરક્ષણ મંત્રાલયના વરિષ્ઠ અધિકારીઓ સમક્ષ વારંવાર ખોટી ફરિયાદો દાખલ કરાવી. આવી ફરિયાદો કાનૂની પ્રક્રિયાનો ઘોર દુરુપયોગ છે અને આ કેસમાં ફોજદારી કાર્યવાહી ચાલુ રાખવી ન્યાયના હિતમાં નથી.
