Last Updated on by Sampurna Samachar
ડોનાલ્ડ ટ્રમ્પના ૪૮ કલાકના અલ્ટિમેટમ મુદ્દે ઈરાન ભડક્યું
ઈરાને વળતો પ્રહાર કરતા કહ્યું છે કે, જો તેમના પાવર પ્લાન્ટ્સ પર હુમલો થશે તો સમગ્ર ખાડી વિસ્તારમાં અંધારપટ છવાશે
(સંપૂર્ણ સમાચાર સેવા)
પશ્ચિમ એશિયામાં વધી રહેલા તણાવ વચ્ચે બંને દેશોએ એકબીજાને ગંભીર પરિણામો ભોગવવાની ચીમકી આપી છે. અમેરિકાએ ઈરાનને ૪૮ કલાકનું અલ્ટીમેટમ આપતા જણાવ્યું છે કે, જો હોર્મુઝ જલડમરુમધ્ય ખોલવામાં નહીં આવે તો ઈરાનના પાવર પ્લાન્ટ્સ પર હુમલો કરવામાં આવશે. આ ધમકીના જવાબમાં ઈરાને વળતો પ્રહાર કરતા કહ્યું છે કે, જો તેમના પાવર પ્લાન્ટ્સ પર હુમલો થશે તો સમગ્ર ખાડી વિસ્તારમાં અંધારપટ છવાઈ જશે.
ઈરાને પોતાની સૈન્ય તાકાત બતાવતા હિંદ મહાસાગરમાં સ્થિત અમેરિકાના અત્યંત મહત્ત્વના સૈન્ય મથક ડિએગો ગાર્સિયા પર બે બેલેસ્ટિક મિસાઈલો દાગી છે. નોંધનીય છે કે હવે ઈરાન ૪,૦૦૦ કિલોમીટર સુધીની મારક ક્ષમતા ધરાવતી મિસાઈલોનો ઉપયોગ કરી રહ્યું છે.
અમેરિકા અને ઈરાન વચ્ચેનો સંઘર્ષ ભયાનક સ્થિતિમાં પહોંચી ગયું
અમેરિકા હાલ ઓપરેશન એપિક ફ્યુરી હેઠળ ઈરાનના સંચાર નેટવર્ક અને મિસાઈલ લોન્ચ પેડ્સને નિશાન બનાવી રહ્યું છે. અમેરિકાનો દાવો છે કે, ઈરાનની નૌસેના અને વાયુસેના નબળી પડી છે પરંતુ ઈરાને ઈઝરાયેલના ડિમોના અને અરાદ જેવા શહેરો પર હુમલા કરીને પોતાની સક્ષમતા પુરવાર કરી છે.
છેલ્લા ૨૩ દિવસથી ચાલી રહેલા આ સૈન્ય સંઘર્ષમાં અત્યાર સુધી ૧,૫૦૦થી વધુ લોકોએ જીવ ગુમાવ્યા છે. આ યુદ્ધના કારણે વૈશ્વિક તેલ બજારમાં પણ ભારે સંકટ ઊભું થયું છે અને કૂટનીતિક પ્રયાસો નિષ્ફળ સાબિત થઈ રહ્યા છે.
