શ્રમિકની પત્નીને તાલિબાની સજા આપવામાં આવી

Last Updated on 14/02/2026 by Sampurna Samachar

રાજકોટના જસદણમાં માર મારતો વીડિયો વાયરલ

પ્રેમીને લોકોએ ભેગા થઈને માર મારીને અધમૂવો કરી નાંખ્યા

(સંપૂર્ણ સમાચાર સેવા)

રાજકોટના જસદણમાં માર મારતો વીડિયો વાયરલ થયો છે. આ વીડિયોને લઈને પોલીસ હરકતમાં આવી છે. આ વીડિયોની તપાસ ASP ને સોંપવામાં આવી છે. વાડીનો માલિક અન્ય સ્ત્રી સાથે રંગરેલિયા મનાવી રહ્યો હતો. આ દરમિયાન સ્થાનિક લોકોએ તેને પકડ્યો હતો અને બંને જણાને માર માર્યો હતો. જીવાપરમાં કારખાનેદાર અને શ્રમિકની પત્નીને તાલિબાની સજા આપવામાં આવી હતી.

જીવાપરમાં આ માર મારતો વીડિયો વાયરલ થયા બાદ સ્થાનિક પોલીસ અંધારામાં હતી. જસદણ પંથકના જીવાપર ગામમાં પ્રેમી પંખીડાઓને માર મારવામાં આવ્યો હતો. તાલિબાની સજા આપતો વીડિયો વાયરલ થયા બાદ ભારે ખળભળાટ મચી જવા પામ્યો હતો. પોલીસ આ ઘટના અંગે અજાણ હોવાનું જણાવી રહી છે.

એક ટોળુ બે પ્રેમીઓને બેફામ માર મારતા નજરે પડે છે

વાયરલ થયેલા વીડિયોમાં મહિલાઓ અને પૂરુષોનું એક ટોળુ બે પ્રેમીઓને બેફામ માર મારતા નજરે પડે છે. બંને માર ખાતા ખાતા ચીસો પાડે છે. પરંતુ કોઈ મદદે આવી રહ્યું નથી. સુત્રોના જણાવ્યા પ્રમાણે આ મામલો કારખાનેદાર અને તેના ત્યાં કામ કરતાં એક શ્રમિકની પત્ની વચ્ચે પ્રેમ સંબંધ હતો. સ્થાનિક પોલીસને આ બાબતે પુછવામાં આવતા પોલીસે આ બાબતે કોઈ જાણ નહીં હોવાનું કહ્યું હતું. જ્યારે રૂરલ એસપી વિજયસિંહ ગુર્જરને પૂછતાં તેમણે કહ્યું હતું કે, વીડિયો મારા ધ્યાને આવ્યો છે. આ ઘટનામાં એએસપીને તપાસ સોંપાઈ છે.