Last Updated on by Sampurna Samachar
મહિલાઓ અને પોલીસ વચ્ચે થયુ ઘર્ષણ
અનેક વિસ્તારોમાં પાણી ઓછું મળતું હોવાની સ્થાનિકોની ફરિયાદ
(સંપૂર્ણ સમાચાર સેવા)
વડોદરામાં ઉનાળાની શરૂઆત સાથે જ પાણીનો કાળો કકળાટ શરૂ થઈ ગયો છે. વાત કરીએ તો શહેરના અનેક વિસ્તારોમાં પાણી ઓછું મળતું હોવાથી કોર્પોરેશન સામે આક્રોશ જોવા મળી રહ્યો છે. ત્યારે સમા વિસ્તારમાં પાણીના મુદ્દે ભારે તંગદિલી સર્જાઈ છે. કોર્પોરેશનના વોર્ડ નંબર ૨ માં છેલ્લા કેટલાક સમયથી પાણીના મુદ્દે લોકોએ રજૂઆત કરી હોવા છતાં કોઈ પરિણામ નહીં મળતા સમા વિસ્તારમાં મહિલાઓ મોટી સંખ્યામાં ભેગા થઈને મોરચો કાઢ્યો હતો.
જ્યાં તેમના દેખાવોને પોલીસની પરવાનગી મળી ન હોવાથી પોલીસે મહિલાઓને મોરચો કાઢવા દીધો ન હતો. જે દરમિયાન પોલીસ અને મહિલાઓ વચ્ચે ઘર્ષણ તેમજ ઝપાઝપી થઈ હતી. એક તબક્કે મહિલા પોલીસની મદદ લઈ પોલીસ દ્વારા વિરોધ કરનારાઓને ટીંગાટોળી કરીને પોલીસ વાનમાં લઈ જવાયા હતા.
૮ થી ૧૦ જણાને વાનમાં બેસાડીને ડિટેન કરાયા
આ કારણસર લોકોએ અમારો વાંક શું છે… કોર્પારેશન પાણી ના આપી શકે અને જો હુકમી અમારા ઉપર કરી રહી છે… તેમ કહી ઉગ્ર રોષ વ્યક્ત કર્યો હતો. પોલીસે ૮ થી ૧૦ જણાને વાનમાં બેસાડીને ડિટેન કરી લીધા હતા. આ દરમિયાન મહિલાઓનો બીજો પણ મોરચો આવી જતા વાતાવરણ વધુ તંગ બન્યું હતું. તો પોલીસે વધુ કાફલો મંગાવ્યો હતો.
