Last Updated on by Sampurna Samachar
ભાજપે વાયરલ વિડીયો અંગે કર્યા કોંગ્રેસ પર પ્રહાર
હાથમાં કીટલી અને એક હાથમાં ચાના ગ્લાસ પકડ્યા
(સંપૂર્ણ સમાચાર સેવા)
વાયરલ થયેલ AI -જનરેટેડ વીડિયોએ કોંગ્રેસ અને ભાજપ વચ્ચે નવો વિવાદ ઉભો કર્યો છે. આ વીડિયોમાં વડાપ્રધાન નરેન્દ્ર મોદી રેડ-કાર્પેટ કાર્યક્રમમાં ચા વેચતા જોવા મળે છે. કોંગ્રેસ નેતા રાગિણી નાયકે તેને ઇન્સ્ટાગ્રામ પર શેર કરીને લખ્યું કે, “હવે આ કોણે કર્યું?” વીડિયો સામે આવ્યાના થોડા સમય પછી, ભાજપે કોંગ્રેસ પર હુમલો કર્યો અને તેને વડા પ્રધાનનું અપમાન ગણાવ્યું હતું.
વીડિયોમાં, વડાપ્રધાન મોદી આછા વાદળી રંગના કોટ અને કાળા પેન્ટમાં જોવા મળે છે. તેમણે એક હાથમાં કીટલી અને એક હાથમાં ચાના ગ્લાસ પકડ્યા છે. તેમની પાછળ આંતરરાષ્ટ્રીય ધ્વજ અને ત્રિરંગો છે. આ વીડિયો AI -જનરેટેડ હોવાનું કહેવાય છે.
કોંગ્રેસે PM મોદીનું ૧૫૦ થી વધુ વખત અપમાન કર્યું
ભાજપના પ્રવક્તા શહઝાદ પૂનાવાલાએ આ વીડિયોની આકરી ટીકા કરતા કહ્યું કે, “રેણુકા ચૌધરીએ સંસદ અને સેનાનું અપમાન કર્યા પછી, હવે રાગિણી નાયકે મોદીના ચાવાળા પૃષ્ઠભૂમિની મજાક ઉડાવી છે.” તેમણે ઉમેર્યું કે, કોંગ્રેસ ” OBC સમુદાયના મહેનતુ વડા પ્રધાનને સ્વીકારી નથી શકતી.”પૂનાવાલાએ આરોપ લગાવ્યો કે, તેમણે મોદીનું ૧૫૦ થી વધુ વખત અપમાન કર્યું છે. તેમની માતાને પણ નિશાન બનાવવામાં આવી હતી. દેશ આને ક્યારેય માફ કરશે નહીં.
સપ્ટેમ્બરમાં બિહાર કોંગ્રેસ દ્વારા શેર કરાયેલા AI વીડિયો મામલે પણ પૂનાવાલાએ નિવેદન આપ્યું હતું. જણાવી દઈએ કે, તે વીડિયોમાં PM મોદી સ્વપ્નમાં તેમની સ્વર્ગસ્થ માતા સાથે વાત કરતા દેખાય છે. આ વીડિયોએ રાજકીય હોબાળો મચાવ્યો હતો, અને પટણા હાઇકોર્ટે કોંગ્રેસને તેને સોશિયલ મીડિયા પરથી દૂર કરવાનો આદેશ આપ્યો હતો.
આ વિવાદ નવો નથી. કોંગ્રેસના નેતાઓએ અગાઉ PM મોદીના ચાવાળા પૃષ્ઠભૂમિ પર નિવેદનો આપ્યા છે. ૨૦૧૪ માં, મણિશંકર ઐયરે કહ્યું હતું કે, મોદી ક્યારેય વડા પ્રધાન નહીં બની શકે અને ચૂંટણી હાર્યા પછી, તેઓ કોંગ્રેસના સંમેલનમાં ચા વેચી શકે છે. આ નિવેદન ભાજપ માટે એક મુખ્ય મુદ્દો બની ગયો હતો.
ભાજપે તેને રાજકીય હથિયારમાં ફેરવી દીધું અને “ચાય પે ચર્ચા” ઝુંબેશ શરૂ કરી, જ્યાં મોદીએ દેશભરના લોકો સાથે વાતચીત કરી હતી. ૨૦૧૭ માં, મોદીની મજાક ઉડાવતો યુથ કોંગ્રેસનો મીમ પણ વિવાદાસ્પદ બન્યો હતો. કોંગ્રેસે બાદમાં આ પોસ્ટ દૂર કરી દીધી હતી.
