Last Updated on by Sampurna Samachar
નંદેસરીમાં SMC નો દરોડો: ૪૦ લાખ ઉપરાંતનો દારૂ પકડાયો
આ દારૂ ના કંસાઇનમેન્ટ પાછળ કોનો હાથ છે અને શહેર પોલીસ કેમ રોકી શકતી નથી તે મુદ્દો ચર્ચા નો વિષય બન્યો છે
(સંપૂર્ણ સમાચાર સેવા)
વડોદરા શહેર પોલીસ માટે શરમજનક કહી શકાય તેવી વધુ એક ઘટના ગઈકાલે મોડી રાત્રે બની છે. સ્ટેટ મોનિટરિંગ સેલે ફરી એકવાર શહેરના પોલીસ સ્ટેશન વિસ્તારમાં દરોડો પાડી લાખોની કિંમતનો દારૂ પકડ્યો છે.
વડોદરામાં દારૂના મોટા કંસાઇનમેન્ટ ઉતારવામાં આવી રહ્યા છે એવા સમયે સ્થાનિક પોલીસ ની જાણ બહાર ગાંધીનગરના સ્ટેટ મોનિટરિંગ સેલ દ્વારા મોટાપાયે દારૂ ઉતારવામાં આવી રહ્યો હોવાના કિસ્સા બની રહ્યા છે. જેથી આ દારૂ ના કંસાઇનમેન્ટ પાછળ કોનો હાથ છે અને શહેર પોલીસ કેમ રોકી શકતી નથી તે મુદ્દો ચર્ચા નો વિષય બન્યો છે.
અંદાજે ૪૦ લાખ ઉપરાંતની કિંમતની દારૂની ૭૦૦ જેટલી પેટીઓ મળી
છાણી પોલીસ સ્ટેશનમાં અગાઉ બે પોઇન્ટ ૬૯ કરોડનો દારૂ પકડાતા પીઆઇ સસ્પેન્ડ થયા હતા. ત્યાર પછી પણ છાણી, જવાહર નગર તેમજ નંદેસરી વિસ્તારમાંથી લાખો ની કિંમત નો દારૂ એસએમસી દ્વારા પકડવામાં આવી રહ્યો છે. નંદેસરી પોલીસ સ્ટેશન વિસ્તારમાં મહીસાગરના કોતરમાં આવેલા રઢિયાળપુરાની સીમમાં દારૂનું મોટું કટીંગ કરવામાં આવી ગયું હતું તે દરમિયાન એસએમસી એ દરોડો પાડતા અંદાજે ૪૦ લાખ ઉપરાંતની કિંમતની દારૂની ૭૦૦ જેટલી પેટીઓ મળી આવી છે. દારૂની ગણતરી કરાયા બાદ નંદેસરી પોલીસ સ્ટેશનમાં ગુનો નોંધવામાં આવશે.
આ બનાવમાં મુખ્ય સૂત્રધાર મનોજ પાપડ અને તેના સાગરીતો ઝડપાયા હોવાની માહિતી મળી છે. પોલીસે એક કન્ટેનર તેમજ અન્ય વાહનો પણ કબજે કર્યા છે. છાણી પોલીસ પણ મનોજ પાપડને શોધી રહી છે ત્યારે એસએમસીના હાથમાં કેવી રીતે પકડાઈ ગયો તે પણ એક ચર્ચાનો વિષય છે. આ ગુનાની તપાસ એસએમસી પોતે જ કરવાનું હોવાની પણ માહિતી પ્રાપ્ત થઈ છે.
