Last Updated on by Sampurna Samachar
વડાપ્રધાન મોદીએ આપ્યો જવાબ જુઓ …
ભારત અને અમેરિકા નજીકના મિત્રો અને કુદરતી ભાગીદારો છે
(સંપૂર્ણ સમાચાર સેવા)
ભારત પર ૫૦ ટકા ટેરિફ લગાવ્યા પછી અને ચીનમાં યોજાયેલી SCO બેઠકમાં PM મોદી, વ્લાદિમીર પુતિન અને શી જિનપિંગની ત્રિપુટીને જોયા પછી, ટ્રમ્પ પોતાના નિવેદનોમાં ભારત પ્રત્યે નરમાઈ બતાવી રહ્યા છે. છેલ્લા કેટલાક દિવસોથી, યુએસ પ્રમુખ ડોનાલ્ડ ટ્રમ્પ ભારત અને વડા પ્રધાન નરેન્દ્ર મોદી પ્રત્યેની તેમની મિત્રતા અને વફાદારી વિશે સતત નિવેદનો આપી રહ્યા છે. હવે PM મોદીએ ડોનાલ્ડ ટ્રમ્પના નિવેદનનો પણ જવાબ આપ્યો છે જેમાં યુએસ પ્રમુખે PM મોદીને તેમના નજીકના મિત્ર અને તેમને મળવા માટે ઉત્સુક ગણાવ્યા છે.
ટ્રમ્પની પોસ્ટને ફરીથી પોસ્ટ કરતા, PM મોદીએ તેમના સોશિયલ મીડિયા પ્લેટફોર્મ પર લખ્યું કે ભારત અને અમેરિકા નજીકના મિત્રો અને કુદરતી ભાગીદારો છે. મને વિશ્વાસ છે કે અમારી વેપાર વાતચીત ભારત-અમેરિકા ભાગીદારીની અપાર શક્યતાઓને ખોલવાનો માર્ગ ખોલશે. અમારી ટીમો આ ચર્ચાઓને શક્ય તેટલી વહેલી તકે પૂર્ણ કરવા માટે કામ કરી રહી છે. હું રાષ્ટ્રપતિ ટ્રમ્પ સાથે વાત કરવા માટે પણ આતુર છું. અમે બંને આપણા લોકો માટે ઉજ્જવળ, વધુ સમૃદ્ધ ભવિષ્ય સુરક્ષિત કરવા માટે સાથે મળીને કામ કરીશું.
બંને દેશો શું પગલાં લે છે તેના પર સૌની નજર
અગાઉ, યુએસ પ્રમુખ ડોનાલ્ડ ટ્રમ્પે સોશિયલ મીડિયા પોસ્ટ દ્વારા જાહેરાત કરી હતી કે ભારત અને અમેરિકા વચ્ચે અટકેલા વેપાર સોદા પર વાતચીત ફરી એકવાર શરૂ થઈ ગઈ છે. ટ્રમ્પે પોતાની પોસ્ટમાં લખ્યું હતું કે, મને એ જાહેરાત કરતા આનંદ થાય છે કે ભારત અને અમેરિકાએ વેપારમાં રહેલી વિસંગતતાઓને દૂર કરવા માટે વેપાર સોદા પર ફરીથી વાટાઘાટો શરૂ કરી છે.
હું આગામી થોડા અઠવાડિયામાં મારા નજીકના મિત્ર વડા પ્રધાન નરેન્દ્ર મોદી સાથે વાત કરવાનું વિચારી રહ્યો છું. મને લાગે છે કે બંને દેશો વચ્ચેના વેપાર ટ્રેડમાં કોઈ મુશ્કેલી નહીં આવે. યુએસ પ્રમુખની આ જાહેરાત પછી, બંને દેશો વચ્ચેના આર્થિક સંબંધો અંગે નવી આશાઓ જાગી છે. નિષ્ણાતો માને છે કે આ પગલું ભારત-અમેરિકા વેપાર ભાગીદારીને એક નવા પરિમાણ પર લઈ જઈ શકે છે.
આ પહેલાં, રશિયા પાસેથી ભારતની તેલ ખરીદીથી ગુસ્સે થયેલા અમેરિકાએ ભારત પર ૫૦ ટકા ટેરિફ લગાવ્યો હતો. આ ટેરિફ ૨૭ ઓગસ્ટથી અમલમાં આવ્યો છે. આ પગલાથી, બંને દેશો વચ્ચે વેપારમાં તણાવ આવ્યો છે. અમેરિકાના રાષ્ટ્રપતિ ડોનાલ્ડ ટ્રમ્પે આ ર્નિણયને યોગ્ય ઠેરવતા કહ્યું કે ભારત રશિયા પાસેથી સસ્તા ભાવે તેલ ખરીદી રહ્યું છે અને તેમાંથી મળેલા પૈસાથી રશિયા યુક્રેન યુદ્ધ ચાલુ રાખી રહ્યું છે.
ટ્રમ્પનો આરોપ છે કે આ યુદ્ધમાં હજારો લોકોએ પોતાનો જીવ ગુમાવ્યો છે અને ભારતની ઊર્જા નીતિ તેને પરોક્ષ રીતે પ્રોત્સાહન આપી રહી છે. ટેરિફ અને આરોપોએ ભારત-અમેરિકા સંબંધો પર નવું દબાણ બનાવ્યું છે. હવે બધાની નજર આગામી દિવસોમાં આ તણાવ ઘટાડવા માટે બંને દેશો શું પગલાં લે છે તેના પર છે.
