હુમલાના કારણે અન્ય મુસાફરોમાં જોખમ ઉભૂ થયુ
(સંપૂર્ણ સમાચાર સેવા)
સુરત પાલિકા સંચાલિત સીટી અને BRTS બસમાં અત્યાર સુધી ડ્રાઈવર અને કંડકટરની દાદાગીરી જોવા મળતી હતી પરંતુ ઉધના વિસ્તારમાં કેટલાક રિક્ષાચાલકોએ પાલિકાની બસના ડ્રાઈવર અને બસ પર હુમલો કર્યો હોવાનો બનાવ બહાર આવ્યો છે. ઉધનામાં BRTS રૂટમાં દોડતી રીક્ષા ચાલક અને સાગરીતોએ બસ ચાલક પર કર્યો હુમલો કર્યો હતો. બસમાં મુસાફરો હતા તેઓ આ હુમલાથી ગભરાઈ ગયા હતા. જોકે, બસના કેમેરામાં હુમલાખોરો ઝડપાયા, પોલીસ ફરિયાદ કરવા કવાયત શરુ થઈ ગઈ છે.
સુરત પાલિકાના BRTS બસ અને સીટી બસના ડ્રાઈવરકો રફ ડ્રાઈવિંગ, સ્ટેન્ડ વિના બસ ઉભી રાખવી કે અકસ્માત માટે કુખ્યાત છે અને બસ ડ્રાઈવર તથા કંડકટર ની દાદાગીરીના કિસ્સા અનેક બહાર આવી ચુક્યા છે. ત્યારે ઉધના BRTS રૂટ પર આવા માથાભારે બસ ડ્રાઈવરને માથાભારે રીક્ષા ચાલકો મળી ગયા હતા. રીક્ષા ચાલક અને સાગરીતો એ હુમલો કરતા બસમાં મુસાફરી કરતા મુસાફરો ગભરાઇ ગયા હતા.
આ અંગે મળતી વિગત અનુસાર સચીન થી કામરેજ તરફ જઈ રહેલી BRTS બસ પાંડેસરા ખાતે દક્ષેશ્વર મહાદેવ મંદિર BRTS રૂટમાં પસાર થઈ રહી હતી. આ દરમિયાન આગળ ચાલી રહેલી રિક્ષાના ચાલકને બસ ચાલક ઓજસ રાઠોડ દ્વારા હોર્ન મારવામાં આવતાં રીક્ષા ચાલકે પિત્તો ગુમાવ્યો હતો. ઉધના ગુરુદ્વારા પાસે રિક્ષા ચાલકે BRTS રૂટમાં જ રીક્ષા આંતરીને મુકી દીધી હતી અને ત્યારબાદ રિક્ષામાં સવાર તેના સાતથી આઠ જેટલા સાગરિતો દ્વારા બસ ચાલક પર હુમલો કર્યો હતો. રિક્ષા ચાલક દ્વારા બસમાં ભારે તોડફોડ કરવાની સાથે ઈમરજન્સી એક્ઝીટ વિન્ડોનો ગ્લાસ પણ તોડી નાખ્યો હતો. અચાનક થયેલા હુમલાના કારણે બસમાં મુસાફરી કરતા મુસાફરો ગભરાઇ ગયા હતા.
