Last Updated on by Sampurna Samachar
અમદાવાદના નવરંગપુરામાં બુલેટ સવારનો આતંક
આ ઘટનામાં એક્ટિવા સવાર યુવક લોહીલુહાણ હાલતમાં બેભાન થઈ જતાં તેને તાત્કાલિક હોસ્પિટલ ખસેડવામાં આવ્યો છે
(સંપૂર્ણ સમાચાર સેવા)
અમદાવાદના નવરંગપુરા વિસ્તારમાં ફરી એકવાર બેફામ ગતિએ દોડતા વાહને અકસ્માત સર્જ્યો છે. સ્ટેડિયમ રોડ પર પૂરઝડપે આવતા એક બુલેટ સવારે એક્ટિવાને જોરદાર ટક્કર મારતા ગંભીર અકસ્માત સર્જાયો હતો. આ ઘટનામાં એક્ટિવા સવાર યુવક લોહીલુહાણ હાલતમાં બેભાન થઈ જતાં તેને તાત્કાલિક હોસ્પિટલ ખસેડવામાં આવ્યો છે.
ગઈકાલ રાત્રે નવરંગપુરા વિસ્તારમાં આવેલા કોમર્સ સિક્સ બિલ્ડિંગ પાસે, મેટ્રો પિલર નંબર ૧૯૫ નજીક આ ઘટના બની હતી. હોટલમાં કામ કરતા વિજયસિંહ પરમાર અને શૈલેષ નામનો યુવક પોતાના એક્ટિવા પર જઈ રહ્યા હતા. આ દરમિયાન એક બેફામ ગતિએ આવતા બુલેટ બાઈક સવારે તેમને પાછળથી જોરદાર ટક્કર મારી હતી. ટક્કર એટલી પ્રચંડ હતી કે એક્ટિવા સવાર બંને યુવકો રોડ પર ફંગોળાયા હતા.
ફરી એકવાર વાહનચાલકોની સુરક્ષા સામે સવાલો ઉભા કર્યા
પ્રત્યક્ષદર્શીઓના જણાવ્યા અનુસાર, બુલેટની ઝડપ એટલી વધારે હતી કે, એક્ટિવા સવારને કાંઇ પણ કરવાની તક મળી નહોતી. અકસ્માતમાં વિજયસિંહ પરમારને મોઢાના ભાગે ગંભીર ઇજાઓ પહોંચી હતી અને તેઓ સ્થળ પર જ લોહીલુહાણ હાલતમાં બેભાન થઈ ગયા હતા. જ્યારે શૈલેષ અને બુલેટ ચાલકને સામાન્ય ઇજાઓ પહોંચી હતી. સ્થાનિક લોકો તાત્કાલિક મદદ માટે દોડી આવ્યા હતા અને ૧૦૮ મારફતે ઇજાગ્રસ્તોને સિવિલ હોસ્પિટલ ખસેડ્યા હતા.
હાલ વિજયસિંહની હાલત નાજુક હોવાનું જાણવા મળી રહ્યું છે.ઘટનાની જાણ થતા જ નવરંગપુરા પોલીસ અને બી-ડિવિઝન ટ્રાફિક પોલીસનો કાફલો ઘટનાસ્થળે પહોંચી ગયો હતો. ટ્રાફિક પોલીસે બુલેટ ચાલક વિરુદ્ધ ગુનો નોંધી વધુ તપાસ હાથ ધરી છે. અમદાવાદના માર્ગો પર વધતા જતા ઓવર સ્પીડિંગના કિસ્સાઓ નિર્દોષ લોકો માટે કાળ સાબિત થઈ રહ્યા છે, ત્યારે આ ઘટનાએ ફરી એકવાર વાહનચાલકોની સુરક્ષા સામે સવાલો ઉભા કર્યા છે.
