ટ્રમ્પે આ ત્રણેય મુલાકાત પર કર્યો કટાક્ષ

Last Updated on 04/09/2025 by Sampurna Samachar

ચીનની સ્વતંત્રતામાં અમેરિકાએ મહત્વપૂર્ણ ભૂમિકા ભજવી

બંને અમેરિકા વિરુદ્ધ કાવતરું ઘડે છે

(સંપૂર્ણ સમાચાર સેવા)

ચીનના વિજય પરેડ પહેલા અમેરિકાના રાષ્ટ્રપતિ ડોનાલ્ડ ટ્રમ્પે રાષ્ટ્રપતિ શી જિનપિંગ, વ્લાદિમીર પુતિન અને કિમ જોંગ ઉન પર કટાક્ષ કર્યો છે. ટ્રમ્પે કહ્યું હતું કે ચીનની સ્વતંત્રતામાં અમેરિકાએ મહત્વપૂર્ણ ભૂમિકા ભજવી છે અને જિનપિંગે આ ભૂલવું ન જોઈએ. રશિયન રાષ્ટ્રપતિ પુતિન અને ઉત્તર કોરિયાના સુપ્રીમ લીડર કિમ જોંગ ઉનની મુલાકાત જોઈને ટ્રમ્પ ગુસ્સે થઈ ગયા. તેમણે આરોપ લગાવ્યો હતો કે બંને અમેરિકા વિરુદ્ધ કાવતરું ઘડે છે.

ટ્રમ્પે સોશિયલ મીડિયા પ્લેટફોર્મ ટ્રૂથ પર એક પોસ્ટ શેર કરી હતી. આ દ્વારા તેમણે કહ્યું હતું કે, “મોટો પ્રશ્ન એ છે કે શું ચીનના રાષ્ટ્રપતિ શી જિનપિંગ અમેરિકાએ ચીનની આઝાદી માટે વહાવેલા ‘લોહી‘નો ઉલ્લેખ કરશે. ચીનની જીતમાં ઘણા અમેરિકનોએ પોતાનો જીવ ગુમાવ્યો.

ભારત સામે વધુ કડક વલણ દાખવ્યું

મને આશા છે કે તેમની બહાદુરી અને બલિદાન યાદ રાખવામાં આવશે! અમેરિકા વિરુદ્ધ કાવતરું ઘડવા બદલ વ્લાદિમીર પુતિન અને કિમ જોંગને મારી તરફથી શુભકામનાઓ.” અમેરિકાના રાષ્ટ્રપતિ ટ્રમ્પે ભારત સહિત ઘણા દેશો પર ટેરિફ લાદી છે પરંતુ ભારત સામે વધુ કડક વલણ દાખવ્યું છે. ટ્રમ્પે તેના પર કુલ ૫૦ ટકા ટેરિફ લાદ્યો છે.

વડાપ્રધાન નરેન્દ્ર મોદી તાજેતરમાં SCO  સમિટમાં ભાગ લેવા ચીન પહોંચ્યા હતા. આ દરમિયાન તેઓ પુતિન અને જિનપિંગ સાથે જોવા મળ્યા હતા. અમેરિકાએ ટેરિફ લાદ્યા પછી ત્રણેયની મુલાકાત ટ્રમ્પ માટે એક મેસેજ જેવી હતી.